Өңірімізде “Бастау бизнес” жобасы бойынша білім алған азаматтар қаржылай қолдауға ие болуда. Жыл басынан бері 84 солтүстікқазақстандық өз ісін ашу мақсатында несие ресімдеді. Олардың 26-сы былтырғы түлектер қатарынан. Осы күнге дейін барлығы 600-ден астам тұрғын 200 айлық есептік көрсеткіш көлеміндегі грантқа қол жеткізді.
Пандемия жағдайына байланысты облыстық кәсіпкерлер палатасы жеке іс бастауға ниетті азаматтарға арналған курстарды онлайн форматта өткізуде. Олар салық, қаржы, маркетинг және өзге де бағыттар бойынша 50-ден астам сабақ пен 12 модуль бойынша дәріс тыңдайды. “9 шілде кәсіпкер болуға тілек білдіргендер үшін оқытудың екінші кезеңі басталды. Қазір 280 солтүстікқазақстандық дәріс алуда. Алғашқы лекте үздік кәсіпкерлердің шеберлік сыныптарына қатысқан 228 адамға сертификат табысталды. Олар өз бизнес-жоспарларын сәтті қорғап, мемлекет тарапынан қаржыландыру құқығына ие болды”, – дейді облыстық кәсіпкерлер палатасының сарапшысы Гүлнәзия Әбілева.
Жаңа талаптарға сәйкес бұдан былай курс тамамдағандар міндетті түрде тестілеуден өтуі тиіс. Бизнес-жобаның да балдық жүйе бойынша бағаланатынын атап өткен жөн. Жоба талабы бойынша 18 ұпай жинаған қатысушы оқуды тамамдағаны туралы сертификатқа ие болады. Ал тестілеуде межелік ұпайға қол жеткізе алмаған жағдайда үміткерлерге қайтадан үш рет тапсыруға мүмкіндік беріледі.
Алғашқы лектің түлектері өз ісін бастауға мемлекеттен қаржылай көмек ала бастады. Олар, негізінен, ауыл шаруашылығы мен қызмет көрсету саласын таңдап отыр. Ауыл тұрғындары көбіне ірі қара мен жылқы шаруашылығына қатысты жобаларды қолға алуда. Ал қалалықтар асхана, сұлулық салондарын ашып, фото және бейнетаспаға түсіру ісімен айналысқанды жөн санайды. “Бизнес-жаттықтырушыларымыз әр аудан бойынша маркетингтік зерттеулер жүргізіп, бизнестің қай түрін жүргізу тиімді екеніне баса назар аударады. Оқу аяқталар сәтте тыңдаушыларымызға бағыт-бағдар беріліп, іс бастау жөнінен жан-жақты көмек көрсетіледі”, – дейді Гүлнәзия Әбілева.
Сағынгүл СӘКЕНОВА,
облыстық кәсіпкерлер палатасының баспасөз хатшысы.