Түркістан қаласында Қазақстанның халық әртісі, опера әншісі, режиссер, көрнекті театр және кино актері Құрманбек Жандарбековтің 120 жылдығына арналған «Қазақтың Құрманбегі» атты І республикалық театрлар фестивалі өтті.
Мәдени шараға еліміздің 13 театры қатысып, өз өнерлерін ортаға салды. Талғампаз көрерменге «Мөлдір махаббат» драмалық қойылымын ұсынған Сәбит Мұқанов атындағы облыстық қазақ сазды-драма театры бас жүлдені жеңіп алды.
– Сәбең театры – жас актерлердің ұстаханасына айналған мәдениет ошағы. Актерлер «Мөлдір махаббатты» өте жоғары деңгейде сахналады. Өнер адамдары: «Нағыз режиссура – мазмұн мен форманың үйлескен сәті» деген сөзді жиі айтады. Шеберлік пен ішкі түйсіктің үйлескен сәтін осы спектакльден көрдім. Асылхан Рәзиев пен Дүйсехан Қасымның өнеріне тәнті болғанымды баса айтқым келеді. Кез келген детальдан көркем дүние шығара алған режиссердің талғамына дән ризамын, – деді қазылар алқасының мүшесі, театртанушы, профессор, Халықаралық театр сыншылары бірлестігінің мүшесі Меруерт Жақсылықова.
Екі жастың махаббатын арқау еткен көркем туынды Айдар Заббаровтың режиссерлігімен сахналанып, жазушының мерейтойы қарсаңында көрермендерге жол тартқан болатын.
Аталмыш фестивальге «Шокан. Монолог шепотом» спектаклімен қатысқан Н.Погодин атындағы облыстық орыс драма театры да жүлделі қайтты. Баатырбек Шамбетовтың режиссерлігімен сахналанған қойылымда Шоқан рөлін сомдаған театр әртісі Константин Демидов «Ең үздік ер адам бейнесі» аталымында жеңімпаз атанды.
Самрат ҚҰСКЕНОВ,
«Soltüstık Qazaqstan».