Жалған кәсіпкерлер, алкогольді және контрафактілік өнімдерді заңсыз айналымға шығаратындар, құмар ойын бизнесі арқылы пайда табатындар, мемлекет қаржысын жымқырғысы келетіндер әлі де айылын жияр емес. Облыстың қаржы полициясы қызметкерлерінің 9 ай ішінде атқарған жұмысының қорытындысы осыны көрсетіп отыр.
Жалған кәсіпкерлік фактілері бойынша былтырғы жылы 8 қылмыстық іс тіркелсе, биылғы жылдың 9 айының ішінде 23 қылмыстық іс қозғалды. Мәселен, арам ойын іске асырмақ болған ұйымдасқан топ банктен “Север Норд” ЖШС-нің есеп айыру шотынан 9,8 миллион теңгенің қаржысын алып жатқан кезде Қаржы полициясы департаментінің қызметкерлері қылмыстың үстінен түсіп, ағайынды екі жігіт темір торға тоғытылды.
Сондай-ақ үстіміздегі жылы алкоголь өнімдерін шығарумен айналысып келген 2 зауыттың заңсыз қызметі тоқтатылды. “Петропавл арақ-шарап зауыты” ЖШС-де жалған есеп-бақылау маркаларын пайдалану фактісі орын алса, Қостанай облысында шығарылатын “Алтын Өмір” ЖШС-нің 21,5 мың бөтелке алкоголь өнімін Петропавлдағы “Триумф” ЖШС заңсыз сатып келген. Соңғы факті бойынша қылмыстық іс қозғалды.
Мемлекеттік инновациялық және инвестициялық жобаларды жүзеге асыруда 15 заңсыздық орын алса, оның 4-еуі “Қазақстан Республикасының 2010-2014 жылдарға арналған үдемелі индустриялық-инновациялық дамуы” мемлекеттік бағдарламасын орындау барысында орын алған. Мәселен, “Солтүстік” ӘКК“ ҰҚ”АҚ-ның мемлекеттік бағдарламаны жүзеге асыру мақсатында бөлген 36 миллион теңгенің қаражатын “Құрғақ көбік-бетон қоспа зауыты” ЖШС-нің директоры Ә.Шәкейдің сатып алынған жабдықтың нақты құнын көтермелеу арқылы жымқырғаны белгілі болды. Сондай-ақ “Солтүстік” ӘКК“ ҰҚ”АҚ басқарма төрағасы А.Чен және “Астық Тобыл” ЖШС-нің директоры К.Құсайынов “Азық-түлік тауарларының өңірлік тұрақтандыру қорын қалыптастыру және пайдалану” мемлекеттік инвестициялық бағдарламасын жүзеге асыру аясында сиыр етін сатып алу кезінде 82,1 миллион теңгенің қаржысын қолды қылған.
Үстіміздегі жылдың 9 айында қаржы полициясының қызметкерлері контрафактілік өнімдердің заңсыз айналымына қатысты 5 қылмыстық істі, жалған ақша шығарушылық фактілері бойынша – 28, заңсыз құмар ойын бизнесі бойынша – 12 қылмыстық істі және 15 салық қылмысын тіркеді.
ҚР Экономикалық қылмысқа және сыбайлас жемқорлыққа қарсы күрес агенттігінің СҚО бойынша департаментінің баспасөз қызметі.