Облыс әкімі Ғауез Нұрмұхамбетов Петропавл қаласында құрылыс жұмыстары жүргізіліп жатқан әлеуметтік нысандарды аралады. Алдағы уақытта облыс орталығында халықаралық деңгейдегі жарыстарды өткізуге мүмкіндік беретін мұз аренасы бой көтермек.
Спорт нысаны Ж.Қизатов көшесінде орналасады. Мұз аренасында 400 метрлік конькимен жүгіру жолы, екі хоккей корты және керлинг алаңдары қарастырылған. Жанынан 50 метрлік олимпиадалық жүзу бассейні, жекпе-жек, көркем гимнастика, волейбол, баскетбол және фитнес залдары бар әмбебап спорт кешені бой көтереді.
– Өңірде халықаралық стандарттарға сай спорт және әлеуметтік нысандар салу бағытында ауқымды жұмыстар жүргізіліп жатыр. Былтыр пайдалануға берілген үстел теннисі орталығы заманауи талаптарға толық сай келеді. Сонымен қатар «Қарасай» стадионы УЕФА стандарттарына сәйкес қайта жаңғыртылған, – деді нысанның құрылысымен танысқан облыс әкімі Ғауез Нұрмұхамбетов.
Өңір басшысының айтуынша, әлеуметтік салада да оң өзгерістер бар. «Береке» шағынауданында жаңа оқу жылында пайдалануға берілетін жайлы мектептің құрылысы аяқталуға жақын. Ал «Жас өркен» шағынауданында балабақша құрылысы қарқын алған. Сондай-ақ Ғауез Нұрмұхамбетов Жұмысшы кентіндегі жол өткелі мен Берекедегі Малая көшесіндегі жол құрылысының барысын бақылады. Барлық мердігерлерге қойылған басты талап – сапалы әрі уақытылы аяқтау.
Азаматтарды қабылдау кезінде түскен өтінішке сәйкес облыс әкімі «Дария» базарының санитарлық жағдайын тексерді. Жалпы базар иелеріне сатып алушыларға жайлы жағдай жасап, санитарлық нормаларды сақтау және аумақты абаттандыру қажет екені айтылды.
Ақерке ДӘУРЕНБЕКҚЫЗЫ,
«Soltüstık Qazaqstan».