Ауған жерінен кеңес әскерінің шығарылғанына биыл 25 жыл толды. Қазір ол тек интернационалист-жауынгерлердің ғана емес, “ыстық нүктеде” соғыстың ащы дәмін татқан барлық балаң жігіттердің де атаулы күні. Ондағы қанды шайқас бірталай абзал азаматтардың өмірін қиды, мүгедек етті. Алайда, олар ештеңеге қарамастан, өздерінің азаматтық борыштарын абыроймен орындады, соңына дейін Отан алдында берген анттарына адал болып қалды. “Ыстық нүктелерде” болған, мұрты әлі тебіндеп үлгермеген біздің жігіттер Ұлы Отан соғысы жылдарында фашизмді жеңген әкелеріміз бен аталарымыздың ерлігіне лайық екендігін танытты.
Сонау 1981-1984 жылдары мен де Ауған жерінде өзімнің азаматтық борышымды өтедім. Ол жылдар оңай болған жоқ, нағыз өмір мектебінен өткендей болдым. Батылдық, ерлік, өз міндетін абыроймен орындау сияқты қасиеттерді танытатын, өмір мен өлімді беттестіріп, болаттай шыңдайтын ортаға тап қылған тағдырыма өкпем жоқ. Қазіргі кезде қалай десе де, интернационалдық борышымызды абыроймен атқарып, туған жерімізге аман оралғанымыздың өзі біз үшін зор бақыт, мол қуаныш.
Облыс орталығындағы “Өрт сөндіру және апаттан құтқару жұмыстары” ММ-нің №1 өрт сөндіру бөлімінде аға нұсқаушы болып еңбек етіп келе жатқаныма да 15 жыл болып қалды. Өртке қарсы қызметтің аға прапорщигімін. Осындай таңдау жасағаныма өкінбеймін. Өйткені, менің мамандығым – мақтанышым. Себебі, біз әрбір отбасының ең қадірлі баспанасын, тірнектеп жинаған дүние-мүлкін, бәрінен бұрын адамның ең қымбатты өмірін тілсіз жаудан аман алып қалуға өзіндік үлесімізді қосып жүрміз. Ынтымағы жарасқан ұжымдағы еңбегім де елеусіз емес. Ауған жерінде алған марапаттарыма ІІІ дәрежелі “Өртке қарсы қызмет органдарындағы мінсіз қызметі үшін” медалі қосылды.
Благовещенка ауылындағы күзет бекетінің бастығы, өртке қарсы қызмет капитаны Айдос Ипов та, Жамбыл аудандық №11 өрт сөндіру бөлімінің прапорщигі Константин Сатраков та, М. Жұмабаев ауданындағы №12 өрт сөндіру бөлімінің прапорщигі Юрий Малофеев те, Мамлют ауданындағы №15 өрт сөндіру бөлімінің аға сержанты Қанат Майсейітов те – Ауған жерінің “дәмін татқандар”, азаматтық борышты бәрінен биік қойғандар. Олар өз ұжымында сонысымен құрметті, сонысымен ардақты.
Асхат ҚОСПАНОВ,
№1 өрт сөндіру бөлімінің аға нұсқаушысы, өртке қарсы қызметтің аға прапорщигі.