«Soltüstık Qazaqstan»

PDF

ҮШ ҚЫЗ

Ерте заманда бір әйелдің үш қызы болыпты. Қиыншылыққа қарамай, күні-түні еңбектеніп, оларды елден кем қылмапты. Үш қыз да бірінен-бірі асқан әдемі, сұлу болыпты деседі. Қыздар бойжетіп, кезегімен күйеуге шығып, жан-жаққа кетіпті. Аналары жалғыз қалған екен.

Көп жылдар өткен соң аналары қартайып, ауырып жатып қалады. Қатты ауырған әйел жақын маңдағы орманда тұратын сиқыршы Сары тиінді шақырып:

– Тиін, тиін, маған қыздарымды шақырып берші, – деп өтініш айтады.  

Сары тиін қыздарын іздеп кетеді. Тиін үлкен қыздың үйіне келіп, терезесін қағып:

– Анаң қатты ауырып жатыр, тез жет! – дейді.

– Әттеген-ай! Мен барар едім, бірақ мына екі ыдысты жууым керек, – деп алдындағы шараларды көрсетеді.

– Анаңнан саған шаралар қымбат болғаны ма? Олай болса, әрқашан да шараларыңнан айрылмай жүр! – деп Сары тиін ашуланады.

Тиін осы сөзді айтқаны сол екен, қос шара қыздың денесіне жабысып, үлкен тасбақаға айналдырып жібереді.

Сиқыршы Сары тиін әйелдің ортаншы қызына барады.

– Анаң қатты ауырып жатыр, тез жет! – дейді.

– Қап! Мен қазір-ақ барар едім. Бірақ жәрмеңкеге әдемі тоқыма дайындап үлгеруім керек, – дейді ортаншы қызы.

Ашуланған Сары тиін:

– Саған анаңнан тоқыма қымбат болса, өмір бойы тоқыма тоқы, – деп өрмекшіге айналдырып жібереді.

Сиқырлы Сары тиін әйелдің үлкен екі қызына көңілі толмай, ренжіп, үшінші кенже қызына келеді.

– Анаң қатты ауырып жатыр, тез жет! – деп Сары тиіннің айтқаны сол еді, кіші қызы илеп жатқан нанын қоя салып, былғанған қолымен анасына жүгіріп кетеді.

– Сенің жүрегің қандай жұмсақ! Саған да адамдар әрқашан қайырымды болсын! Өмірің ұзақ болсын! Бақытты бол! Жасаған жақсылығың ұмытылмасын! Адамдар сені әрқашан құрметтеп, жақсы көрсін! – деп Сары тиін қызға алғысын білдіреді.

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp