Ел Тәуелсіздігінің 25 жылдық мерейтойына орай сотталғандарға рақымшылық жасалады. Кешегі қылмыскер бостандыққа шыққаннан кейін қоғамға қауіп төндірмей ме, Сіз қалай ойлайсыз?
Берік БІЛӘЛОВ,
облыстық ішкі істер департаментінің бастығы, полиция генерал-майоры:
– Ұлы мерекелер қарсаңында жаза басып, опық жегендерге кешірім жасалып жатады. Тәуелсіздіктің ширек ғасырлық мерей-тойына орай Мемлекет басшысы “Рақымшылық туралы”, Заңға қол қоятын болса, онда еліміз бойынша 1800-дей жазасын өтеуші мерзімінен бұрын бостандыққа шығады. Ал кімдерге кешірім жасалатыны жөнінде айтар болсақ, алдымен азаматтардың әлеуметтік әлжуаз санаттары – кәмелетке толмағандар, жүкті әйелдер, кәмелетке толмаған балалары немесе мүгедек балалары бар әйелдер, сондай-ақ, кәмелетке толмаған балалардың жалғыз ата-анасы болып табылатын ер адамдар, I, II және III топтағы мүгедектер, елу жастағы және ол жастан асқан әйелдер, алпыс жастағы және ол жастан асқан ер адамдар, Ұлы Отан соғысының қатысушылары мен мүгедектері және оларға теңестірілген адамдар тізімге енеді. Бірақ аса ауыр қылмыс жасағандарға, лаңкестік бабы бойынша сотталғандарға кешірім жасалмайды. Сондықтан кешегі қылмыскер бүгінгі күні қоғамға қауіп төндіреді деп қорқудың қажеті жоқ. Тағы бір айта кететін жайт, рақымшылыққа ілігіп, бостандыққа шыққандар арнайы құқық қорғау органдарының тізімінде болады.
Қазақта “Адасқанның айыбы жоқ, қайта үйірін тапса” деген ұлағат бар. Өмірде сүрінбейтін тұяқ, жаңылмайтын жақ жоқ қой, сондықтан жаза басқандар үшін жаңа өмірге мүмкіндік берілуі өте орынды.
Дайындаған
Айгүл ЫСҚАҚОВА,
“Солтүстік Қазақстан”.