Облыстық полиция департаментінде ведомствоның бірінші басшысының және оның орынбасарларының азаматтарды жеке қабылдауы жалғасуда. Апта сайын облыстық полиция департаментінің бастығы, полиция полковнигі Марат Төлебаев алдын ала жазылу бойынша азаматтарды қабылдайды.
Қауіпті індеттің таралуы салдарынан енгізілген шектеу шараларына байланысты қабылдау “Азаматтарды қабылдау” алаңдарынан бейнеқоңырау арқылы жүзеге асырылады. Мұндай алаңдар өңірдің әрбір полиция бөлінісінде ұйымдастырылды. Күз басталғалы осындай форматта 39 азамат, оның 23-ін полиция департаментінің бастығы Марат Төлебаев, қалғандарын орынбасарлары қабылдаған. Соңғы қабылдауда облыстық полиция бастығына жеті адам жүгінді. Тұрғындар сұрақтарының басым бөлігі қылмыстық істерді тергеуге, ішкі істер органдарына жұмысқа орналасуға қатысты болды. Марат Сағынтайұлына жүгінген азаматтардың барлығы тыңдалып, олар көтерген мәселелерді шешу үшін бөлініс басшыларына қажетті нұсқаулар берілді.
Полиция департаменті құжаттамалық қамтамасыз ету басқармасының басшысы Динара Қожантаеваның ақпараты бойынша, тоғыз айдың ішінде өңірдегі полиция бөліністері басшылығының жеке қабылдауында 1122 адам болған, оның ішінде облыстық полиция департаментінің бастығы Марат Төлебаев – 90, орынбасарлары 42 адамды, қалғандарын қалалық және аудандық басқармалардың және облыстық полиция департаменті бөлімдерінің бірінші басшылары қабылдаған.
Мәдина БАЛҒАШОҚОВА,
облыстық полиция департаменті ішкі және сыртқы коммуникациялар бөлімінің бастығы.