Қазіргі таңда өңіріміздегі елді мекендердің 410-ы, яғни 64,56 пайызы интернетпен қамтылып отыр. Бұл ауылдық жерде тұратын 273 мыңға жуық адам заманауи байланыс жүйесімен қамтылғанын білдіреді. Ал 37 мыңнан астам тұрғыны бар 225 ауылда әлі күнге сапалы интернет жоқ.
Қуанышты жаңалық – жыл соңына дейін тағы 133 ауылға интернет жүйесі тартылады. Жобалар негізінен мемлекеттік-жекешелік әріптестік бойынша қолға алынуда. Қазір кеңжолақты интернет 75 елді мекенге жетіп үлгерді. Мәселен, Уәлиханов ауданына қарасты Мортық, Қоңдыбай, Көбенсай ауылдарында тиісті жұмыстар атқарылуда.
Барлық елді мекенге бір мезетте кеңжолақты желі тарту мүмкін емес, сондықтан 70 ауыл “Beeline”, “Kcell”, “Altel”, “Tele 2” ұялы байланыс операторлары арқылы мобильді интернетті пайдаланатын болады. Келесі жылы бұл жұмыстар жалғасын тауып, жеті мыңнан астам тұрғыны бар 21 елді мекенге мобильді интернет қосылады. Бұл ауылдардың әрқайсысында 250-ден артық тұрғын бар.
Байланыс мамандарының айтуынша, алдағы бір-екі жылда өңір тұрғындарының 95 пайызы кеңжолақты интернеттің игілігін көретін болады. Дегенмен, осы жылдың жоспарына енбеген 20 мыңға жуық тұрғыны бар 172 ауылда бұл мәселе әлі өзекті күйінде қалып отыр.
Өмір ЕСҚАЛИ,
“Soltústik Qazaqstan”.