Дүниежүзін тарының қауызына сыйдырардай үрей құшағына алған әлемдік пандемия кезінде біздің елде әрбір тұрғынның амандығы үшін бастарын бәйгеге тіге жүріп, алғы шепте қызмет еткен азаматтар қатары аз болды деп айта алмаймыз. Олардың қауіп пен қатердің белортасында ұйымдастырылған жұмыстарын, адал еңбектерін ынталандыру мақсатында Мемлекет басшысы Қасым-Жомарт Тоқаев “Халық алғысы” медалін тағайындаған болатын. Төтенше жағдай кезінде өңіріміздегі қазақ баспасөзінің қарашаңырағы облыстық “Soltústik Qazaqstan” газетінің ұжымы да жұмысын бір сәтке тоқтатпады. Осы орайда өзінің еңбекқорлығы мен ізденімпаздығының арқасында сын сағаттарда қоғамға жанашырлық таныта білген әріптесіміз, газетіміздің бөлім меңгерушісі Ақмарал Есдәулетованың еңбегін айта кету ләзім. Облыстық әкімдікте өткен салтанатты шарада өңір басшысының орынбасары Ғани Нығыметов оның кеудесіне “Халық алғысы” медалін тақты.
Ақмарал Құрманайқызын көзі қарақты оқырман қаламы жүйрік, ойы ұшқыр журналист ретінде жақсы таниды. Карантин уақытында дүниені дүрбелеңге салған дауасыз дертпен күрестегі білікті дәрігерлердің еңбегі, еріктілердің қызметі, мемлекет тарапынан тұрғындарға көрсетіліп жатқан көмектер туралы өндірте жазған әріптесімізді осынау жетістігімен құттықтаймыз.
“Қызылжар-Ақпарат”
ЖШС-нің ұжымы.