Қазақстанның саяси-қоғамдық өмірінде жерлесіміз, Ғабит Мүсірепов атындағы ауданның Жаңасу ауылының тумасы Еркін Әуелбековтің есімі ерекше ілтипатпен аталады. Ол көзі тірісінде белгілі де беделді, аузы дуалы аса көрнекті мемлекет қайраткерлерінің бірі де бірегейі болды. Басқа қызметтерін айтпағанда, Еркін Нұржанұлының Көкшетау, Торғай және Қызылорда облыстарын басқарған кездегі ерен еңбегін сол өңірлердің тұрғындары әлі күнге дейін ұмытқан емес. Олардың қай-қайсының да экономикасын, әлеуметтік жағдайын көтеруге айтарлықтай үлес қосып, іскер де білікті басшы ретінде тұрғындардың құрметіне бөленді.
Өзге басшылардан жұмыс істеу стилімен, қарапайымдылығымен ерекшеленген азаматтың туғанына 90 жыл толуына орай жерлестері аудан орталығында ғылыми-тәжірибелік конференция ұйымдастырды. Еркін Әуелбековті, оның тынымды істерін еске алуға облыс орталығынан, Ақмола облысынан, өңіріміздің басқа аудандарынан делегациялар арнайы келіп, жергілікті еңбек ардагерлері бас қосып, Еркін Нұржанұлының құрметіне қойылған мүсінге гүл шоқтарын қойды.
Конференцияны ашқан аудан әкімі Ағзам Тастеміров ақтаңгер азаматтың еліміздің игілігі үшін жасаған адал еңбегі жайлы сөз сабақтады. “Еркін Нұржанұлы бар ғұмырын елі мен жеріне кіршіксіз қызмет етуге, ұлттық құндылықтарымыз бен салт-дәстүрлерімізді насихаттауға арнаған жан. Туған халқының алдындағы жауапкершілігін әрқашан есте сақтап, қызметтік міндетін бірінші орынға қойып, күн демей, түн демей еңбектенген ол қай салада болмасын туындаған мәселелердің түйінін тарқата білетін. Осылайша, туған жерінің дамуына үлес қосып, замандас, әріптес, жолдастарының жадында мәңгі із қалдырды. Азаматтың игі істерін жас ұрпаққа үлгі ету мақсатында аудан орталығындағы көшелердің біріне есімі беріліп, орталық алаңда бюст орнатылған болатын”, – деген аудан әкімі биылғы мерейтойға орай да бірқатар іс-шаралар жоспарланғанын тілге тиек етті. Жеңіс саябағында Даңқ аллеясы орнатылып, азаматтың есімі алтын әріппен жазылды. Жаңасу ауылында Еркін Нұржанұлының бастамасымен салынған мектепке жөндеу жұмыстары жүргізіліп, мұражай жаңартылып, кеңейтілгені де – жағымды жаңалықтардың бірі. Ауылдың ішінде абаттандыру жұмыстары қолға алынып, мемлекет қайраткері тұрған үйге күрделі жөндеу жұмыстары жүргізілген.
Содан кейін облыстық ішкі саясат басқармасының басшысы Кемел Оспанов, Көкшетау қалалық ардагерлер кеңесінің төрағасы Шияп Алиев, еңбек ардагері, өңіріміздің құрметті азаматы Құдайберген Қалиев, Айыртау аудандық ардагерлер кеңесінің төрағасы Армия Әбілқайыров және Еркін Әуелбековтің туған інісі Болат Әуелбеков бастаған азаматтар сөз алып, мерейтой иесіне қатысты естеліктерімен бөлісті. Мінбеге көтерілгендердің қай-қайсысы да Еркін Нұржанұлының ешкімге бұра тартпайтын турашылдығын, жаны мен арының тазалығын, істің көзін білетін көрегендігін, бастаған шаруаны аяғына дейін тындыратын іскерлігін жоғары бағалады. Шара барысында қатысушылардың назарына Еркін Әуелбековке арналған бейнебаяндар ұсынылды.
Еліміздің игі жақсылары туралы шығарылған “Азамат” атты кітапта Ілия Нұр дейтін автордың “Еркін ағаны жоқтау” атты өлеңінде:
“Құрметтеп, қалың жұрты сүйіп еді,
Сүйсініп, ақылына ұйып еді.
Жұлдыздай жарқ етті де ағып өтті,
Қай жақсы бұл дүниеге сыйып еді?” – деген өлең жолдары кездеседі. Иә, барлық ғұмырын қалың қазағының бақытты болашағы үшін сарп еткен тұлғаның есімі жұртшылық жадынан өшпесі анық.
Шолпан САЛЫҚОВА.