Осыдан 10 жыл бұрын Тайынша ауданында индустриялық-инновациялық және агроазық-түлік бағдарламалары бойынша 10 миллиард теңгеге “Биохим” өндірістік кешені бой көтеріп, ТМД-дағы тұңғыш озық технология ретінде бағаланды.
Сапасы төмен, сұрыбы нашар бидайды қалдықсыз өңдей отырып, астық балуызын, биоэтанол алу, бензиннің осы қоспасы арқылы ауаға шығарылатын зиянды заттар мөлшерін 30 пайызға дейін азайту міндеті қойылды. Алайда, “ХХІ ғасырдың биотехнологиялық кластері” деген жанама атау берілген кәсіпорын кредиторлық қарыздардың көбеюі, тағы басқа себептер салдарынан ауылшаруашылық өнімдерінің бәсекеге төтеп беру қабілеттілігінен айрылып, өз жұмысын тоқтатуға мәжбүр болды.
Енді, міне, қалталы алпауыттар жеті жыл бойы қаңтарылып тұрған зауытты тездетіп қалпына келтіруге кірісті. Облыс басшысы Ерік Сұлтанов Тайынша ауданына барған жұмыс сапарында өндіріс орнында болып, инвесторлармен кездесті. Әңгіме барысында кешенді іске қосуға дайындық шаралары талқыланды. “Bio Operations” компаниясы “ҚазМұнайГаз” АҚ және “BioLinekz” ЖШС-нің қатысуымен қалпына келтіру жұмыстарын жүргізеді. Диірмен, одан кейін крахмал, ұлпа өндіретін цехтар жаңартылады. Оларға құрал-жабдықтар Кытайдан, Ресейден, Түркиядан, Англиядан әкелініп, орнатылады. Ұнға деген ішкі-сыртқы сұраныс ескеріліп, қазандықтарды, қоймаларды, диірмендерді жедел іске қосу тапсырылды.
Іскерлік кездесу барысында кешеннің сумен жабдықталуына, электр жарығына, жылу жүйесіне қосылуына барлық техникалық мүмкіндіктердің жұмылдырылатыны, бөгесін болмайтыны айтылды.
“BioLinekz” ЖШС-нің жобалау жөніндегі директоры Жандос Есенбайдың айтуынша, бүгінде кешенге су, телефон, электр желілерін тартудың техникалық шарттары жасалып, қондырғылар сараптамадан өткен. Жоспар бойынша ірі өндіріс ошағында 220 адамды тұрақты жұмыспен қамту көзделіп отыр.
Өмір ШАЛАБАЙҰЛЫ,
“Солтүстік Қазақстан”.