Жаңа оқу жылынан бастап елімізде докторанттар мен педагогикалық мамандықта оқитын студенттердің шәкіртақысы артты. М.Қозыбаев атындағы Солтүстік Қазақстан университеті ректорының міндетін атқарушы Ербол Исақаев өңірімізде осындай мүмкіндікке ие болған студенттер жайлы айтты.
Болашақ педагогтардың шәкіртақысын 42 мыңға дейін өсіру қажеттігі жайлы Мемлекет басшысы Қасым-Жомарт Тоқаев Ұлттық қоғамдық кеңестің кезекті отырысында айтқан болатын. Басқа мамандықтардың студенттеріне төленетін шәкіртақы бұрынғыша – 26186 теңге көлемінде өзгеріссіз қалады. Осыған дейін 102498 теңге шәкіртақы алатын докторанттарға төленетін стипендия 150000 теңгеге жетті.
Қазіргі таңда М. Қозыбаев атындағы СҚУ-де білім алып жүрген студенттердің үш мыңнан астамы педагогикалық мамандықты таңдаған. “Үстіміздегі жылы педагогикалық мамандықтарға 400-ден астам студент түсті. Бұл өткен жылдармен салыстырғанда әлдеқайда көп. Ал жоғарылатылған шәкіртақы алу мүмкіндігіне 1800-ден астам студент ие болды. Сәйкесінше, жоғары оқу орнына түсуге арналған шектік балдың 65-тен 70-ке дейін өскенін айта кеткен жөн. Болашақ ұстаздарға қойылатын талапты жоғарылату арқылы олардың жауапкершілігін де арттыруға мүмкіндік туып отыр”, – деді М.Қозыбаев атындағы Солтүстік Қазақстан университеті ректорының міндетін атқарушы Ербол Исақаев. Білім ордасында 42 докторант білім алуда. Жаңа оқу жылынан бастап оларға да жоғарылатылған шәкіртақы алу мүмкіндігі берілді.
Биыл М.Қозыбаев атындағы Солтүстік Қазақстан университетіне “Қазақ тілі мен әдебиеті” мамандығына грантқа түскен Зухра Серғали жоғарылатылған шәкіртақы алу мүмкіндігіне ие болғандардың қатарында. Есіл ауданындағы Тауағаш орта мектебін тамамдаған студент жақында алғашқы шәкіртақысын алды. “Педагог болып, бала тәрбиесімен айналысу екінің бірінің қолынан келе бермейтін іс екенін барлығымыз жақсы білеміз. Мемлекет тарапынан жасалып отырған бұл қолдауды болашақ мамандарға артылған үлкен сенім деп түсінеміз. Сондықтан үмітті ақтау үшін аянбаймыз. Алғашқы шәкіртақымнан жергілікті мешітке садақа беріп, қалғанын өз қажеттілігіме жұмсамақпын”, – деді Зухра Серғали.
Диана ХАЛИМОВА,
М.Қозыбаев атындағы СҚУ-дің медиа орталығының бас редакторы.