“Қызылжар су” жауапкершілігі шектеулі серіктестігі облыс орталығының тұрғындарын тіршілік көзімен қамтамасыз етіп отырған стратегиялық маңызы зор кәсіпорын. Бүгінгі күні серіктестікте бір мыңға жуық маман қызмет етуде. Солардың бірі – жөндеу-механикалық шеберханасының бригадирі Бердімұрат Дүйсембаев.
Ол еңбек жолын су құдықтарын жөндеумен айналысатын темір ұстасы болып бастаған. Қазіргі уақытта шеберханада қызмет ететін отыздан астам маманға бар білгенін үйретуде.
– Біздің негізгі қызметіміз – апаттық жағдай орын алған кезде істен шыққан кез келген құрал-сайманды жөндеп, жұмыстың тоқтап қалуына жол бермеу. Қазір жағдайымыз жақсы, күнделікті жұмысымызға қажетті қосалқы бөлшектер уақтылы келіп тұрады. Жалпы сорғы құрылғылары мен су құдықтарына да жөндеу жұмыстарын жүргіземіз, – дейді ол.
Жөндеу-механикалық шеберханасындағы темір ұста, металл жонушы, фрезерші, электр-газбен дәнекерлеуші сияқты мамандар үш бригадаға бөлінген. Олар қатаң тәртіпке бағынып, өз жұмысына асқан жауапкершілікпен қарайды. Сондықтан жөндеу бригадаларын қажетті құрал-саймандармен қамтып отыратын бұл шеберхананың жұмысы бір тоқтамайды.
Қанат АТАМАНОВ, “Soltústik Qazaqstan”.
СУРЕТТЕ: (солдан оңға қарай) бригадир Б.Дүйсембаев; шеберхана басшысы С.Ысқақов.
Суретті түсірген Амангелді БЕКМҰРАТОВ.