Қазақстан халқы Ассамблеясы бүгінге дейін көптеген игі істердің бастамашасы бола білді. Тұрақтылық пен өзара түсіністіктің бірегей моделін қалыптастыруда маңызды рөл атқарып келеді. Оның 25 жылдығына орай жас волонтерлердің, қоғамдық ұйымдардың қатысуымен С.Мұқанов атындағы ғылыми-әмбебеп кітапханада “Қазақтану” ғылыми-ағартушылық жобасы шеңберінде “Мен қазақпын” атты онлайн акция өтті. Маңызы зор шараны облыстық “Азаматтық альянс” бірлестігі мемлекеттік әлеуметтік тапсырыс бойынша ұйымдастырды.
Жиынды Қазақстан халқы Ассамблеясының баспасөз қызметінің сарапшысы, “Рухани даму” қоғамдық қорының төрайымы Камал Әлпейісова жүргізіп отырды. “Дөңгелек үстелдің” модераторы өз сөзінде жүзден астам этнос өкілдерін бір шаңырақ астына біріктіріп отырған басты құндылықтарға кеңінен тоқталып, қоғамдағы әлеуметтік мәселелерді шешу мен табыстарға жетудің кілті, басты шарты достыққа негізделгенін атап өтті.
– 2020 жыл – бәріміз үшін айрықша жыл. Ширек ғасыр ішінде еліміз небір қиындықтарды бастан өткеріп, өз даму жолын тапты. Тұңғыш Президентіміз Нұрсұлтан Назарбаевтың бастамасымен құрылған бірегей институт тәуелсіздігіміздің орнығуына тірек болып келеді. Қазақ халқы мен оның маңайына топтасқан өзге этностар “Қазақстан – біздің ортақ Отанымыз!” деген ұранмен бірігіп, егемендігіміздің 30 жылдығына үлкен табыстармен келіп отыр, – деді Камал Әлпейісова.
Ішкі саясат басқармасының бөлім жетекшісі Әсем Нұрланқызы, “Қоғамдық келісім” ММК басшысының орынбасары Мария Татаренко елімізде бейбітшілік пен ынтымақты сақтауға Қазақстан халқы Ассамблеясының жергілікті бөлімшелерінің, этномәдени бірлестіктердің қосып отырған үлесін, атқарылған іс-шараларды баяндады.
Жанат МҰХАМЕДЖАНОВ,
“Азаматтық альянс” ұйымының төрағасы.