М.Қозыбаев атындағы Солтүстік Қазақстан университетінде Қазақстанның еңбек сіңірген қайраткері, профессор Зарқын Тайшыбайдың шығармашылық қызметіне 60 жыл толуына орай конференция өтті. Жиынға қадірлі азаматтың замандастары, қаламгерлер, жоғары оқу орнының оқытушылары мен журналистер қатысты. Пайым-парасаты биік ұстаз еңбегін өскелең ұрпаққа өнеге ету мақсатында ұйымдастырылған шараны еліміздің түкпір-түкпіріндегі зиялы қауым өкілдері онлайн режімде тамашалап, олар шараның басты кейіпкеріне ақ тілектерін арнау мүмкіндігіне ие болды.
М.Қозыбаев атындағы СҚУ-дің ғылым және инновациялар жөніндегі проректоры Ақмарал Ыбыраева салтанатты шараны аша отыра, Зарқын Тайшыбайдың өңірімізде журналистика мектебінің негізін қалап, өз алдына отандық тілшілер мектебін қалыптастырудағы және ғылым саласына қосқан зор үлесін тілге тиек етті. Біздің өңірімізге келгенге дейін қаламгер 1992 жылы Евней Букетов атындағы Қарағанды мемлекеттік университетінде “Журналистика” кафедрасына жетекшілік еткен. Кейін 2002 жылы Солтүстік Қазақстан мемлекеттік университетіне арнайы шақырылып, тұңғыш рет тілшілерді даярлайтын бөлім ашты. Зейнеткерлікке шықса да, жастарға сабақ беруден қол үзбеген Зарқын Тайшыбай 20 жылға жуық уақыт ішінде 180-ге тарта бакалавр мен 17 магистр тәрбиелеп шығарды. Оның ғылым саласында да атқарған еңбегі ұшан-теңіз. Қазақ тарихын зерттеу жолында 10 монография, 12 оқу құралы мен оқулық, 250-ге тарта мақала жазды. “Этномәдени зерттеулер” ғылыми орталығын ашып, ұлт мақтанышы Абылай хан, Абай Құнанбаев пен Мағжан Жұмабаевтың өмірі мен шығармашылығына арналған құнды еңбектер басып шығарды. Ғалым Алаштану ісінде, өңіріміздің тарихын қағаз бетіне түсіруде де көп еңбектенді. Бірнеше данамен тараған кітаптарында ономастика мәселелері, Есіл бойындағы қазақтардың тарихы және атақты жерлестеріміздің ғылыми еңбегі туралы сөз қозғап, өңіріміздің өткеніне қатысты қызықты деректерден тұратын туындыларды дүниеге әкелді. Сондай-ақ, жерлесіміз – 2018 жылы жарық көрген 5-7-сынып оқушыларына арналған “Өлкетану” оқулығының авторы.
Зарқын Сыздықұлының осы және өзге де қырлары сөз етілген шара барысында облыс әкімінің орынбасары Ғани Нығыметов өңір басшысы Құмар Ақсақаловтың қуаныш иесіне арнаған құттықтау сөзін оқып берді. Бұдан кейін М.Қозыбаев атындағы СҚУ ректорының міндетін атқарушы Нұрлан Бәйімбетов, облыстық ардагерлер кеңесінің төрағасы Ескендір Елеусізов, филология ғылымдарының докторы Бауыржан Жақып, әл-Фараби атындағы Қазақ Ұлттық университетінің деканы Сағатбек Медеубекұлы және тағы бірқатар қонақтар жүрекжарды лебіздерін арнап, иығына шапан жапты. Өзге қатысушылар да оның тәуелсіздіктің алғашқы жылдарында журналист болып жемісті қызмет істегенін, қазақ руханиятының алға басуына сүбелі үлес қосып келе жатқанын еске салды. Бірге қызметтес болған замандас әріптестері мен шәкірттері қызықты естеліктер айтып, Зарқын Тайшыбайдың абзал қасиеттері мен үлгі боларлық өнегелі өмірінен сыр шертті.
Жиын барысында Зарқын Сыздықұлы Қазақстан жоғары мектебі Ұлттық ғылым академиясының академигі атанғаны хабарланды.
Гүлбике КУБЕНОВА,
“Soltústik Qazaqstan”.
Суретті түсірген
Талғат ТӘНІБАЕВ.