Қазақстандық аралас жекпе-жек шебері Қуат Хамитов (18-7-1) Ресейде өткен “Fight Nights Global 98” турнирінде айқын басымдықпен жеңіске жетті.
Мәскеу төрінде ұйымдастырылған айқаста отандасымыз әу баста ресейлік Олег Косиновпен (7-5) кездесуі керек еді. Алайда, жарысқа бір күн қалғанда оның орнына тағы бір ресейлік спортшы Ахмад-Хан Боков шығатыны белгілі болды. 74 килограмм салмақ дәрежесінде өткен кездесуде “Найман” лақап атымен танылған Қуат қарсыласын бірінші раундтың орта тұсында қылқындыру әдісімен жеңіп кетті. Ол бұл жеңісін классикалық күрестен Олимпиада чемпионы марқұм Жақсылық Үшкемпіровке арнады.
Бұл Қуат Хамитовтың кәсіби мансабындағы 19-шы және соңғы төрт жылдағы алғашқы жеңісі. 32 жастағы қазақстандық 2016 жылдан кейін аралас жекпе-жек спортында бірінші рет жеңіс тойын тойлады. Бұл уақыт аралығында үш айқас өткізген ол үшеуінде де қарсыластарына жол берген еді.