“Жақсының жақсылығын айт, нұры тасысын” деген сөз бар емес пе қазақта. Жұмабек Тәшенев атындағы №20 орта мектеп ұжымына алғыс айтқым келеді.
Үш баланы жалғыз өсіріп жатқан жайым бар. Бұл мектептің бұрынғы директоры Данияр Шәкенов басымыздан қиыншылық өткеріп жатқанымызды білген кезде, қол ұшын беріп, қолғабыс етуден аянбады. Мақтанып айтатын дүние емес, әрине, бірақ басқа түссе баспақшыл деген. Бір күн де тыныш отырмаймын, үш жерде қатар еңбектенген де кезім болды, бірақ қалай тартсам да қысқа жіп күрмеуге келмейді. Бір жерде отыз мың, бір жерде он бес мың, үшінші жерде он екі мың теңге айлығым пәтер жалдау ақысынан, жолпұлдан артылмады. Оқу ісінің меңгерушісі, қазір мектеп директорының міндетін атқарып отырған Гүлім Қайыркенқызы да көмек көрсетті. Мектептің әлеуметтік ұстазы Бауыржан Тасболатов “Мектепке жол” акциясынан қалдырмады, жыл сайын жазғы сауықтыру лагеріне тегін жолдама беріп отырды. Өз басым қаражат шығарып, баламды сауықтыру лагеріне жөнелте алмас едім. Балаларыма ыстық тамақ беріледі.
Дәл солай мектептің әрбір ұстазын жеке-дара атап өтсем де еш артық болмас еді. Алғашқы ұстазымыз Жанар Ақжігітова мейірімді сөзімен де, қайырымды ісімен де баламның үлкен өмірге оң қадам басуына септігін тигізді. Мектеп психологы Бахытгүл Қалиева әр істе балаларыма қолдау көрсетуден аянып қалмады. Ол кісінің жетекшілігімен ұлым ғылыми жоба қорғап, жүлделі орын иеленді. Сынып жетекшілері Жанар Ақжігітова, Күләйім Тұрсынова, Бибігүл Еламановаға да алғысым шексіз. Мінеки, қазіргі заман ұстазының бейнесі осындай. Мойнына жүктелген жұмысын атқарып қана қоймай, елге қайырымдылық жасаудан да қалыспайды. Ұстаз атын биік ұстап, болашақ Қазақ елін көтеретін азаматтарды тәрбиелеп жатқандарыңыз үшін мың алғыс! Отбасыларыңызға амандық-саулық, береке қонсын, әлемді тұмшалаған ауыр індеттен аман болсын деген тілегімді айтқым келеді.
Қыс кезінде отыннан тапшылық көрген едік. Мешіт имамдары бізбен хабарласып, үйге жеткілікті етіп отын әкеп берді. Азық-түлік түрінде, басқалай да көмек көрсетуін тоқтатқан жоқ. “Мектепке жол” акциясы аясында Қазақстан мұсылмандары діни басқармасының 30 жылдығы құрметіне алынған 10 ноутбуктің бірінің бақытты иесі атандық.
Тұңғышым тоғызыншы сыныпты тамамдады, қалған екеуі оқуын жалғастыруда. Қазіргі таңда қаланың басқа шетіне көшіп кеткендіктен мектепті ауыстыруымызға тура келді. Аллаға шүкір, ауысып барған мектебіміз де жаман емес, бізге ұнайды. Тек балаларым бауыр басып қалған Жұмабек Тәшенев атындағы №20 орта мектеп ұжымына алғыс айтқым келеді.
Қымбат САЙДАЛИНА,
Петропавл қаласының тұрғыны.