Марат Ысқақов – Петропавл қалалық мәслихатының №1 сайлау округі бойынша депутаты, бюджет, қаржы, экономика салаларын дамыту мәселелері жөніндегі тұрақты депутаттық комиссиясының төрағасы. Облыстық кәсіпкерлер палатасы төрағасының орынбасары, «AMANAT» партиясының мүшесі.
Не үшін депутат болдым?
Мен кәсіпкерлікті қолдау саласында көп жыл еңбек еттім. Осы бағыттағы салалық басқарманың басшысы болдым. Қазір облыстық кәсіпкерлер палатасында қызмет атқарып жүрмін. Мұнда еңбек етіп жүргеніме он жылға жуықтады. Бір сөзбен айтқанда, бизнес саласы өкілдерін толғандыратын мәселелерді жақсы білемін. Осы мәселелерді шешуге өз үлесімді қосу үшін қалалық мәслихат депутаты болуға шешім қабылдадым. Дәл қалалық мәслихатты таңдауымның да өзіндік себебі бар. Аудандармен салыстырғанда ең көп инвестиция Петропавл қаласына тиесілі. Инвестиция тарту талап етіліп, бюджеттің мақсатты жұмсалуын қадағалау – қалалық мәслихаттың құзырына жататын іс.
Сайлаушыларға қандай уәде бердім?
Маған қарасты №1 сайлау округінің аумағына Былғары зауыты, Ойқала шағынаудандары мен Заречный кентінің бір бөлігі кіреді. Сайлауалды үгіт-насихат кезінде тұрғындармен кездесіп, тұрғын үй- коммуналдық шаруашылығы бойынша туындаған мәселелерді шешуге, денсаулық сақтау, жол жағдайы, аумақты абаттандыру мәселелеріне назар аударатынымды айттым. Мен бір жылдары ағынды су кәріздерін тазарту құрылғылары саласында жұмыс істедім. Ал Ойқала мен Былғары зауыты шағынаудандарында жолдың жоқтығынан бөлек, ағынды су кәріздері проблемасы жиі көтеріледі. Мен тұрғындармен кездескен кезде оларды толғандырған мәселелерге басымдық беріп, оларды шешуге атсалысатынымды айттым.
Қызметіме байланысты көп адамдармен жүздесемін. Яғни тұрғындарды қандай мәселе толғандырса да, олармен тікелей жұмыс істеуден бас тартпаймын. Өткен жылы көктемгі су тасқыны болғаны белгілі. Мен зардап шеккендерге тұрғын үй бөлу үшін құрылған комиссияның мүшесі болдым. Комиссия құрамында отырып менің сайлау округіме қарайтын шағынаудан тұрғындарын толғандырып жүрген мәселелермен жете таныстым. Қарғын судың зардабын тартқан тұрғындар менің комиссия мүшесі ғана емес, өздері сайлаған депутат ретінде де қабылдауыма келіп, баршасымен жеке кездесулер өткіздім.
Жалпы қазір тұрғындарды толғандыратын негізгі мәселе – жолдың сапасы және абаттандыру. Облыс әкімі Ғауез Нұрмұхамбетов Петропавл қаласындағы жолдардың барлығына асфальт төселетінін айтты. Әрине, тасқын судан кейін әлі көп мәселе шешімін тапқан жоқ. Депутат ретінде тұрғындардың өтініш-тілектерінің орындалуына барынша қолғабыс етіп жүрмін.
Жиі көтерілетін абаттандыру, инфрақұрылымға қатысты мәселелер тұрғын үй- коммуналдық шаруашылығы бөлімі мамандарына айтылды, қала әкімінің орынбасары барлық жағдайдан хабардар. Мәселен, тұрғындар орталық жылу және сумен қамту жүйесіне қосылғанды қалайды. Дегенмен бұл ауқымды жұмыс және мол қаражатты қажет етеді. Сондықтан жақын арада шешіле қоймасы анық.
Қай уәдемді орындадым?
Жұмыс барысында сайлаушыларды толғандыратын мәселелер шешімін тауып жатады. Былғары зауыты шағынауданы тұрғындары фельдшерлік пункт ашуды сұрады. Себебі оларға қалаға жету қиын. Қазіргі таңда Былғары зауыты шағынауданында фельдшерлік пункт жұмыс істеп тұр. Аталған аудан тұрғындарының емін- еркін жүріп-тұруына логистика мәселесі кедергі болып отыр. Осы ретте көп жылдан бері шешілмей келе жатқан автобус жайын айтпасқа болмас. Депутат болған күннен бері Былғары зауыты, Ойқала шағынаудандарын басып өтіп, «Жас өркен» жаққа баратын автобус бағытын ұйымдастыру мәселесін көтеріп жүрмін. Егер осындай қоғамдық көлік бағыты іске қосылса, Былғары зауыты шағынауданындағы балалардың Оқушылар сарайына, А.Винокуров атындағы спорт сарайына жетуі жеңілдер еді. Өкінішке қарай, бұл мәселе әлі басы ашық күйінде тұр. Себебі қоғамдық көлік иелерімен бұл мәселені шешуде ортақ келісімге келе алмай жүрмін. Мәселенің мәнін Петропавл қалалық мәслихатының әр сессиясында айтып келемін. Қала әкімі қоғамдық көліктердің бағытын қайта қарауға уәде берді. Күн тәртібінде тұрған бұл мәселе шешімін тапқанға дейін талқылана береді.
Ойқала шағынауданында да фельдшерлік пункт ашу мәселесі көтерілген еді. Қазір онда жекеменшік компания емхана ашты. Қазіргі таңда қабылдау сонда жүріп жатыр. Ал бұрынғы кинотеатрдың ғимаратында фельдшерлік пункт жұмыс істеп тұр.
Халық маған сене ме?
Мен өзіме қарасты шағынаудандардың «WhatsApp»-тағы чатында бармын. Бұл – жергілікті тұрғындарды қандай мәселелер толғандыратынын және шұғыл мәселелерді дереу шешу үшін аса тиімді байланыс құралы. Жоғарыда менің сайлау округіме Заречный шағынауданының бір бөлігі қарайтынын айттым. Бірақ бұл аудан тұрғындарымен кездескенде мекенжай бойынша емес, келгендердің барлығының өтініш- тілегін тыңдаймын. Себебі олар көтеретін мәселе бәріне ортақ. Қазіргі таңда аудан тұрғындарын қауіпсіз жерге біржола көшіру жайы толғандырады. Халықтың ішкі уайымдары да осымен байланысты. Көп жылдан бері жер үйде тұрып, өз шаруашылығын ұстаған адамдарды «Қайда көшіреді?» және «Қандай баспана беріледі?» деген сауал мазалайды. Өз өтініштерінің ескерілгенін қалайтын тұрғындар жыл сайын су басатын жерде өмір сүру мүмкін емес екенін түсінеді. Бұл халыққа да, билікке де шаш етектен шығын әкеледі. Өткен жылы мемлекет су басқан аудандардың тұрғындарына жан-жақты қолдау көрсетті. Оны осы жұмыстың бел ортасында жүрген біз ғана емес, бүкіл республика тұрғындары көрді, естіді. Мұндай жағдай қайталанбауы үшін нақты шешім қажет. Жергілікті билік тиімді жол ұсынып отыр. Осы ретте тұрғындар да бұл мәселеге жауапкершілікпен қарауы керек деп ойлаймын.
Дайындаған
Арайлым БЕЙСЕНБАЕВА,
«Soltüstık Qazaqstan».