Спорттық акробатикадан мамандандырылған балалар мен жасөспірімдер спорт мектебіне күрделі жөндеу жұмыстары жүргізілді.
“Қарасай” стадионының аумағында орналасқан мектептің іргетасы 1967 жылы қаланыпты. Ескірген ғимаратты күрделі жөндеуден өткізу үшін биыл облыстық бюджеттен 22 миллион теңге бөлінген. Мектеп директоры Ринат Белогоновтың айтуынша, бұл қомақты қаражат білім ошағының қасбеті мен шатырын, тәрбиеленушілердің киімжайы мен душ кабиналарын жаңартуға мүмкіндік берген. Оған қоса терезелері, едені және жарықтандыру жүйесі ауыстырылған.
– Мектебіміздің спорт залын жөндеуге 3,5 млн. теңге бөлінді. Бұдан бөлек, нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған “Еңбек” мемлекеттік бағдарламасы аясында акробатикамен айналысуға қажетті заманауи жабдықтар сатып алдық. Мұның барлығын тәрбиеленушілеріміздің дүбірлі додаларда жақсы нәтижелерге қол жеткізуі үшін жасап жатырмыз. Мысалы, өткен жыл біздің құрама үшін табысты болды. Олар көптеген дүбірлі додалардан жүлделі оралды, – дейді Ринат Рашитович.
Бүгіндері бұл мектепте 300-ге жуық бала акробатикамен айналысады. Солардың бірі – 17 жасында спорт шебері атанып үлгерген Александр Шашков. Спортпен 10 жасынан бастап шұғылданып жүрген талапты өрен – республикалық және халықаралық жарыстардың жүлдегері. Ол өткен жылдың қазан айында Португалияда жалауы желбіреген халықаралық турнирде күміс медаль иеленген. Жас акробат мектебінің бастан-аяқ жөнделгеніне дән риза.
Нұржан СЕЙІЛБЕКОВ.