Петропавл қаласының 63 жастағы тұрғыны Комсомольская көшесіндегі үйінің ауласынан тұрмыста қажетті баспалдақ, қоларба, ет сүрлеуге арналған құрылғы, үш метрлік бес құбырдың жоғалғанын айтып, полицияға арыз берген.
Келтірілген шығынды ол 98 мың теңгеге бағалаған. Жәбірленушінің ойынша, ұрлық екі-үш күн бұрын болған. Криминалдық полиция бөлімінің қызметкерлері жедел-іздестіру іс-шараларын өткізіп, жақын маңда тұратын бұрын ұрлық жасағаны үшін бірнеше рет сотталған 39 жастағы қала тұрғынының қылмысқа қатысы барын анықтаған. Ұрланған заттар металл қабылдау орындарының бірінен табылған. Тиісті ресімдерден кейін заттар заңды иесіне қайтарылады.