Облыстық статистика департаментінің мәліметіне сүйенсек, 2016 жылғы қаңтардағы күнкөрістің ең төменгі деңгейі 18735 теңгені құрады. Аудан орталықтары бойынша бұл көрсеткіш – 19064 теңге, ал Петропавл қаласы тұрғындары үшін жан басына шаққанда қажетті қаржы 18198 теңге деп белгіленді.
Күнкөрістің ең төмен деңгейі – бір адамның ең төменгі мөлшерде тұтыну көрсеткішінен жасалатын табыс көлемі. Ең төменгі тұтыну қоржынына ішетін тамағының, киетін киімінің, пайдаланатын қызметтерінің ең аз жиынтығы енгізіледі. Ондағы азық-түлік – 60 пайыз, азық-түлік емес тауарлар мен ақылы қызметтер 40 пайыз мөлшерінде. Азық-түлік қоржынында 43 тамақ өнімінің атауы енгізілген. Яғни, оған ет, балық, сүт, май мен тоңмай, нан, жеміс-көкөніс, жұмыртқа, қант, шай, дәмдеуіштер және басқа тағамдар кіргізіледі.
Өңіріміздің күнкөріс деңгейі өткен аймен салыстырғанда 2,3 пайызға көтерілді. Бұл – халық тұтынатын әлеуметтік маңызы бар тауарларға бағаның өскендігінің белгісі. Ең төменгі күнкөріс деңгейінің көлемі адамның қарнын ашырмауға ғана жеткілікті екендігі түсінікті.
Облыстық статистика департаменті жүргізген мониторинг қаңтар айында бір адам азық-түлікке – 11241 теңге, азық-түлік емес тауарлар мен ақылы қызметтерге 7494 теңге жұмсағандығын көрсетті. Күнкөріс деңгейі сомасының 21,2 пайызы – ет пен балыққа, 16,5 пайызы – сүт, май өнімдері мен жұмыртқаға, 10,5 пайызы – жемістер мен көкөністерге, 9,2 пайызы – нан және жарма өнімдеріне, 2,6 пайызы қант, шай және дәмдеуіштерге жұмсалған. Ал осы деңгей шамасын халықтың әлеуметтік-демографиялық топтарына жіктеп есептесек, онда 13 жасқа дейінгі бала үшін – 15056 теңге, 14-17 жасқа дейінгі ер бала үшін – 23674 теңге, ал әр қызға 18138 теңге ақша талап етілген. Еңбекке қабілетті 18 жастан асқан ер адам өзінің бір айлық қорегі үшін – 22305 теңге, ал нәзік жан 17711 теңге жұмсаған. Зейнеткерлер 17521 теңгені қанағат тұтқан.
Гүлгүл ҚУАТҚЫЗЫ,
“Солтүстік Қазақстан”.