КӘСІПКЕРДІ СЕРГЕЛДЕҢГЕ САЛҒАН

Петропавлдық жеке кәсіпкер Татьяна Мошанның газ құю стан­са­сын аша алмай жүргеніне бір­неше айдың жүзі болды. Бәріне Петропавл қалалық құрылыс, сәу­лет және қала құрылысы бөлімі­нің сәулеттік-жоспарлау тапсыр­масын бермеуі себеп. Істі бастау­ға рұқсат ететін маңызды құжатты алу үшін жеке кәсіпкер Петро­павл қалалық әкімдігіне алғаш рет осыдан үш ай бұрын жүгінген. Со­дан бері әкімдіктің жауапты бөліміндегілер құжатты бес мәр­те қайтарып жіберген. Мемлекет­тік органның жауабын қараған об­лыстық кәсіпкерлер палатасы­ның сарапшылары олардың не­гіз­сіз екенін анықтады және мем­ле­кеттік қызметті көрсету уақы­тын созу жемқорлық фактісін тудыруы мүмкін деген сенімде.

Татьяна Мошанның арызы кә­сіпкерлердің құқығын қорғау және жемқорлыққа қарсы іс-қимыл кеңесінің кезекті отырысында қа­ралып, жиынға жауапты мемле­кеттік органдардың өкілдері ша­қырылды. Палата сарапшысы Ти­мур Елеукин атап өткендей, мем­лекеттік қызметшілер кәсіп­кер­дің бес өтінішіне бес түрлі уәж айт­қан. Алайда, заң бойынша рұқ­саттаманы беруге кедергі келті­ретін фактілер болған жағдайда бірден нақты көрсетілуі тиіс.
– Мәселен, бірінші рет құжатты беруге учаскенің бас жоспарға сәйкес келмеуі және 100 метрден кем емес санитарлық-қорғау ай­ма­ғының болмауы негізге алын­ған. Бірақ бұл учаске өндірістік және коммуналдық қоймалар ау­мағында орналасқандықтан, мұн­да жасыл желектің жоқтығы бел­гілі болды. Бұған қоса кәсіпкердің жер теліміне жақын маңда жанар-жағармай құю стансасын салуға берілген жер учаскесі де бар екен. Оның санитарлық-қорғау ай­мағы небәрі 50 метрді құрайтын көрінеді. Сондықтан алғаш рет рұқ­сат бермеуге еш негіз жоқ. Ке­лесі жолы бөлімдегілер кәсіп­кер­дің құжаттарын “ҚазАвтоЖол” ҰК” АҚ-ның қосымша келісімі қажет деп қайтарып жіберген. Заңға сүйе­нсек, мұндай келісім жер ал­ғаш рет беріліп жатқанда ғана та­лап етіледі. Ал бизнес иесі меке­меге жер аламын деп емес, сәу­леттік-жоспарлау тапсырмасын ре­сімдеуге жүгінген. Оған қоса, мемлекеттік қызметтің стандар­тын­да да мұндай келісімді алу қарастырылмаған, – деп атап өтті облыстық кә­сіпкерлер палатасы­ның сарап­шысы Тимур Елеукин.
Алтын уақытын жоғалтқан Татья­на Мошан ақыр соңында мұн­дай құжаттың қажеті жоқ де­ген жауап алыпты. Қағазбасты­лық­тың салдарынан сергелдеңге түскен кәсіпкер құрылыс, сәулет және қала құрылысы бөліміне қайта барған. “Төртінші рет жол­дың жанасуы бойынша арнайы техникалық шарттардың бол­мауы алға тартылған. Бұл жолы жолдың жанасуының техникалық шарттарын ресімдеуге қалалық әкімдік аппаратына жіберген. Ал кәсіпкер жолдың жанасуына қа­тысты құжаттама емес, сәулет-жос­парлау тапсырмасын ресім­деу үшін жүгінді. Демек, мұның барлығы істі әдейі созғанын анық байқатып тұр. Осылайша, кәсіп­кер іс бастауға кедергі келтіріп, пара беруге итермелеп тұр”, – де­ді палата сарапшысы.
Кәсіпкер болса, уақытының зая кетіп, қымбатқа сатып алын­ған құрал-жабдықтың қаңырап тұр­ғанына налиды. “Құжатты ала­мыз деп үш ай жүріп қалдық. Биз­нес үшін әр күн қымбат. Арнайы құрылғыларды алуға миллионда­ған қаржы салдық. Қазір бір құ­жат­тың кесірінен ол құрал-жаб­дық қоймада шаң басып жатыр. Шаруамыз қаңтарылып қалды”, – дейді өкпесі қара қазандай бол­ған жеке кәсіпкер Татьяна Мошан.
Кеңес отырысына қатысқан қа­ла­лық құрылыс, сәулет және қа­ла құрылысы бөлімінің әдіскері Виталий Янышев өз әрекеттері­нің заңды екеніне сенімді. Ал жа­уаптардың әр алуандығын арыз­дарды қарау кезінде бөлімде ма­ман жетіспей, оларды қолы боса­ғаны қарап, әртүрлі жауап берге­німен түсіндірді.
– Сәулет-жобалау тапсырма­сын дайындап берген күннің өзін­де алда эскиздік жоба қарасты­рылғанда жолдың жанасуына қа­тысты құжаттың болмауы, стан­са­ға барар-шығар жолдардың анықталмауы арызды қайта қа­рауға әкеліп соқтырады. Біз бұл істі әдейі со­зып отырған жоқпыз, кәсіпкердің құқығын да бұзғымыз келмейді. Сондықтан техникалық шарттар және жолдың жанасуы мәселесін қазірден шешіп алу қа­жет деп есептейміз, – деп түсін­дірді Вита­лий Янышев.
Бірақ кеңес мүшелері мұны­мен келіспейді. “Бұл отырыста біз газ құю стансасын салу үшін қа­жетті сәулет-жоспарлау тапсыр­масын алуда туындаған кедергі­лердің заңсыз екенін айтып отыр­мыз. Жолдың жанасуының бұған қатысы жоқ. Егер кәсіпкер осы мә­селемен арызданса, сәулет-жоспарлау тапсырмасы қайда деп қайта бетін қақпақсыңдар ғой? Сәулет-жоспарлау тапсырмасын ал­майынша, мына құжатты жаса­маймыз деп шықпайтындарыңа кім кепіл? Бұл жерде нақты жауап керек. Құжатты дайындап беру­ден бас тартуға шынымен заңды негіз бар ма?” – деп қорытын­дылады Тимур Елеукин.
Кәсіпкерді сергелдеңге салған құжат мәселесі жақын арада оң шешімін таппаса, кеңес мүшелері анықталған фактілер туралы Мем­­лекеттік қызмет істері агент­тігінің жергілікті департаментіне жүгініп, кәсіпкердің құқығын қор­ғамақшы. Қалалық әкімдіктің ап­параты берген ақпаратқа қарасақ, бөлімнің әдіскері осы ісі үшін тәртіптік жауапкершілікке тарты­лып үлгеріпті. Бірақ кәсіпкердің арызы әлі күнге шешімін тапқан жоқ.
Сағынгүл ІРГЕБАЕВА,
облыстық кәсіпкерлер палатасының баспасөз хатшысы.