Облыс орталығында тұратын көмекке мұқтаж 4875 отбасына 50 мың теңгеден жәрдемақы берілді.
“Nur Otan” партиясы облыстық филиалы баспасөз қызметінің мәліметінше, қаржы “Birgemiz” қорынан аударылған. Жәрдемақы тұрмысы нашар, әлеуметтік жағынан аз қамтылған отбасыларға берілді. Көмекке ие болғандардың тізімін жергілікті билік органдары әзірлеген. Бұл жолғы жәрдемақы бұрын ақшалай қолдауға ие болмаған отбасыларға беріліп отыр.
Жәрдемақыны алғандардың қатарында Борис Кузнецов та бар. “Жақында ғана ауруханадан шыққан едім. Бұл ақша қазіргі уақытта маған үлкен көмек болды”, – дейді қуанышын жасырмаған қала тұрғыны.
“Birgemiz” қорынан бірреттік жәрдемақы 7 санат бойынша беріледі, олар: аз қамтылған көпбалалы отбасылар, мүмкіндігі шектеулі азаматтар, төмен зейнетақы алатын зейнеткерлер, ата-анасыз қалған балалар, соғыс ардагерлері, тыл еңбеккерлері және асырауында мүмкіндігі шектеулі баласы бар отбасылар. Жәрдемақы осымен бесінші рет беріліп отыр. Бұған дейін мұндай көмек өңірімізде 18 мыңнан астам адамға көрсетілген.
Гүлбике КУБЕНОВА,
“Soltústik Qazaqstan”.