– Памперс сәби үшін зиян дегенді естіп жүрмін. Аналарға, әсіресе, жас келіншектерге бала күтімінде қолайлы болғанымен, сәбидің денсаулығына зиян келтіріп жүрмей ме?
Динара ХАМЗИНА.
Петропавл қаласы.
Бұл сұраққа балалар дәрігері Эльдар Алханов жауап береді:
– Памперстің күнделікті өмірімізге енгеніне 50 жылдай ғана болды. Қалай десек те, баланың дәрет тазалығына бірден-бір көмек құралы ретінде бір реттік жаялықшаны қолдануға әбден әуестеніп алдық. Былай қарағанда, пайдасы тиіп жатқанымен, мұның зиянды-зиянсыздығын әлі ешкім дөп басып айта алмайды. Балаға оны күндіз-түні кигізіп қою анаға оңай, ал сәбиге ше? Ата-ананың түн ұйқысын бұзбайды, қонаққа барса да қолайлы, күнделікті жаялық жуудан қолы бос. Дегенмен, оның зиянды жағын да естен шығармаған жөн.
Бір реттік жаялықшаны ер балаларға қолдану тіптен зиянды. Памперс буланып, баланың бойында қоздырғыштық әсер тудырып, ұрық жасушыларының құрылымына зиян тигізеді. Жаялықшаны күнде пайдалануға болмайды. Керегінде тазалыққа қолданатын көмекші құрал деп қана түсінген дұрыс. Оны баланы емізердің алдында немесе соңында ауыстырған жөн. Қыдыруға шығарда, не келген соң, ұйықтар алдында, не ұйқыдан оянғанда, болмаса дәретке отырысымен ауыстыру керек. Кейбір ата-аналар баланы 3-4 айлығында тосып үйретеді. Бұл өте дұрыс. Өйткені, бала осы әдіске машықтанып, горшокқа да тез үйреніп кетеді.
Дайындаған
Гүлден СИМБАЕВА,
М.Қозыбаев атындағы СҚУ-дің студенті.