Еліміздегі қылмыстық-атқару жүйесіне пробация қызметінің енгізілгеніне көп бола қойған жоқ. Бұл қызметтің мақсаты – шартты түрде бас бостандығынан айрылған азаматтарға әлеуметтік-құқықтық қызмет көрсету. Атап айтар болсақ, түзу жолдан адасқандардың білім алуына, кәсіп меңгеріп, жұмысқа орналасуына ықпал жасау, ауырып қалса, дәрігерлік көмек көрсетуді қамтамасыз ету болып табылады. Әлеуметтік-құқықтық көмек әрқайсысының қажеттілігіне байланысты көрсетіледі. Пробациялық қызметке жергілікті атқарушы органдар, үкіметтік емес ұйымдар жәрдемдеседі.
Бүгінгі күні облыстық қылмыстық атқару жүйесі департаментінің Мамлют ауданы бойынша пробациялық қызмет бөлімшесі сотталғандарға әлеуметтік-құқықтық көмек көрсету бойынша нәтижелі жұмыс жүргізуде. Үстіміздегі жылдың 10 айында 21 жазасын өтеушіге қатысты жеке бағдарламалар жасалды. Бағдарламада олардың мұқтаждықтары көрсетіліп, осылайша біздің тарапымыздан қандай көмек түрі қажеттігі анықталады.
Биыл жазасын өтеп шыққан 13 азаматтың жұмыс табуына көмектестік. Бұған қоса, денсаулық сақтау органдарымен бірге 21 сотталғанға психологиялық көмек көрсетілді, сондай-ақ, бір сотталған маскүнемдіктен емделуде. Тағы бір түзеу орнында мерзімі аяқталған азаматқа жеке басын куәландыратын құжаттарын рәсімдедік. Соңғы 10 айдың ішінде Мамлют ауданының пробация қызметі 42 жеке бағдарлама шеңберінде әлеуметтік-құқықтық көмек берді.
Мырзабек ОМАРОВ,
облыстық қылмыстық-атқару жүйесі департаментінің Мамлют ауданы бойынша аға инспекторы.