Қызылжар ауданының Бәйтерек ауылында жоғалып кеткен 6 жасар бала аман-сау отбасына оралды. Сәбиді аудандық полиция бөлімінің тәртіп сақшылары тауып алған.
Полиция аға лейтенанты Алмас Қазбекенов пен полиция лейтенанты Дмитрий Белоусов кезекшілік атқарып жүрген кезінде Петропавл – Нұр-Сұлтан тасжолының жиегінде тұрған баланы байқап қалады. Ол Бәйтерек ауылындағы үйінің ауласынан шығып кетіп, адасып қалған. Полицейлер баладан мән-жайды сұрастыра келе оны аудан орталығы – Бескөл ауылында тұратын әжесіне апарған. Ата-анасы ұлын өздігінен іздеуге шыққан екен. Олар балаларының аман екендігіне көздері жеткен соң облыстық полиция департаментінің бастығы, полиция полковнигі Марат Төлебаевқа хат жазып, тәртіп сақшыларына ризашылығын білдірді.
“Халық сеніміне ие болған тәртіп сақшылары жолдарда қауіпсіздікті қамтамасыз ету бағытында әлі де талай игі істерді атқарады деген ойдамын”, – дейді патрулді полиция батальонының командирі Ерлан Мәдиев.
Гүлбике КУБЕНОВА,
“Soltústik Qazaqstan”.