Мағжан Жұмабаев ауданының тұрғыны Евгений Золотарев соңғы бірнеше жылдың көлемінде қырыққабат, қызанақ және қияр өсірумен айналысуда. Туған өлкесінде кәсібін өрге домалатқан іскер жанның өнімін облыс тұрғындары тұтынады.
Дала басында қарбалас жұмыс әлі жүріп жатыр. Қияр мен қызанақ жиналып бітсе, қырыққабатты суық түспей қоймаларға жеткізіп алу керек. Ауа райы мүмкіндік берсе, жұмысшылар 150 тонна қырыққабат жинауды жоспарлап отыр. Медвежка ауылының түбіндегі алқаптарды бірнеше жылдан бері баптап жүрген жеке кәсіпкер Евгений Золотарев биыл мол өнімнен үмітті. Бастапқыда аудан әкімдігінен 4 гектар жер сұрап алған ол қазір көкеніс алқабының көлемін 14 гектарға дейін жеткізді.
– Мен өсірген қырыққабатты “Солтүстік” әлеуметтік кәсіпкерлік корпорациясы сатып алып, тұрғындарға қолжетімді бағамен өткізеді. Биыл оларға 200 тонна өнім жеткізбекпін. Сонымен қатар “Семейный” супермаркеттер желісімен, “Южный” базарымен және аудандағы бірнеше сауда нүктелерімен келісіп, сатып жүрмін, – дейді Евгений Золотарев.
Қырыққабат өсіру – араға 10 жыл салып туған ауылына қайтып оралған Евгений Золотаревтың негізгі кәсібі. Ол ауыл мектебінде 9-сыныпты тамамдаған соң облыс орталығындағы гуманитарлық-техникалық колледжде техник-бағдарламашы мамандығын меңгереді. Кейін әскерге алынып, Отан алдындағы борышын өтеп, Петропавлдағы кеңселердің бірінде еңбек жолын бастайды. Бір кездері аула сыпырғанын да жасырмайды. Бірақ табыстың кілтін туған жерінде тапты. “Ауылыма 6 жыл бұрын небары 80 мың теңгемен келіп, үш бұзау сатып алдым. Бір жылдан соң мал басы 17-ге жетті. Кейін досыммен бірлесіп, азық-түлік дүкенін аштық. Біраздан соң ғимарат сатып алдым, жеке дүкенім пайда болды. Сол кезде тұтынушылар тарапынан қырыққабатқа деген сұраныстың бар екенін байқадым. Алғашқы өнімді жұрт лезде сатып әкетті. Сол күннен бастап аталмыш көкөністі өсіруді қолға алдым”, – дейді кәсіпкер.
Қырыққабат пен қызанақтың көшеттері далаға отырғызылады, ал қияр жылыжайда жақсы өнім береді екен. Биыл қызанақ көшеттерінен – 20, қиярдан 5 тонна өнім жиналған. Көктемде көкөністі уақтылы отырғызып, күзде мол өнімді дер кезінде жиып алу үшін Евгений ауылдастары мен еліміздің оңтүстік өңірлерінен көшіп келген ағайындардың көмегіне жүгінеді. Қауырт кезде жалдамалы жұмысшылардың саны 30-ға дейін жетеді екен. Өйткені, негізгі жұмыс қолмен атқарылады. Ал жерді жыртып, суаруға тракторы бар. Оны сатып алу үшін Евгений Золотарев “Ауыл шаруашылығын қаржылай қолдау қоры” АҚ-ның облыстық филиалына жүгініпті. “Еңбек” бағдарламасы аясында небары 6 пайызбен несие алған.
Жеке кәсіпкер тек пайда мен табысты ғана ойламай, туған ауылындағы мектебіне қолынан келгенше қолдау көрсетуде. Евгений Золотарев білім ошағының асханасына қажетті көкөністерді тегін береді екен. Тұрмысы төмен отбасыларға да көмек қолын созудан аянбайды. Жақында іскер азамат “Атамекен” ұлттық кәсіпкерлер палатасы облыстық филиалының жанындағы өңірлік кеңестің құрамына мүше болып кірді. Ондағы мақсаты – Қызылжар өңіріндегі шағын және орта кәсіпкерлікте кездесетін күрделі мәселелерді шешуге өзіндік үлесін қосу.
Гүлмира ШОҚТЫБАЕВА,
“Soltústik Qazaqstan”.