“Мемлекеттік мүлікті сенімгерлік басқаруға беру қағидаларын бекіту туралы” Қазақстан Республикасы Ұлттық экономика министрінің 2015 жылғы 16 қаңтардағы бұйрығына сәйкес мемлекеттік мүлік заңды және жеке тұлғаларға сенімгерлік басқаруға беріледі. Ол қағаз түрінде келісімшарт жасасу арқылы жүзеге асырылады.
Департамент басшылығы бұл жұмысты жеңілдету мақсатында Ұлттық экономика министрлігіне келісімшарт жасасу рәсімін www.gosreestr.kz сайты арқылы жүргізу қажеттігі туралы ұсыныс жіберген болатын. Себебі, келісім-шарт электронды сандық қолтаңбаның көмегімен жасалған уақытта сыбайлас жемқорлық әрекеттердің туындауына жол берілмейді. Қазіргі уақытта бұл мәселе Үкіметте қарастырылуда.
Мемлекеттік кәсіпорынның мүліктік кешені, бағалы қағаздар, жарғылық капиталдағы қатысу үлестері, жылжымайтын мүлік, мемлекетке тиесілі ақша, сондай-ақ, өзге де мемлекеттік мүлік келісімшарт нысанасы бола алады. Мысалы, облыстық мемлекеттік мүлік және жекешелендіру департаменті жиһаз жасау, киім тігу цехтары, көкөніс өсіруге арналған жылыжайлар, сондай-ақ, автокөлік және өзге техниканы жөндеу стансалары, бос үй-жайларды сенімгерлік басқаруға береді. Бұлардың басым бөлігі қылмыстық-атқару жүйесі органдарына тиесілі. Оларды ешқандай тендерсіз-ақ жеке кәсіпкерлерге сенімгерлік басқаруға беруге болады. Осылайша, темір тордың арғы жағында жазасын өтеп жүргендер тұрақты жұмыспен қамтылады.
Бүгінгі күні департаментте 8 сенімгерлік басқару келісімшарты бойынша жұмыс жүргізілуде. Атап айтқанда, Ішкі істер министрлігінің қылмыстық-атқару жүйесіне қарасты 5 бос нысан келісімшарт бойынша жалға берілді. Сөйтіп, сотталғандардың ішінен 45 адам жұмысқа орналастырылды. Мемлекеттік мүлікті сенімді басқарудың шарттары бойынша жиһаз және тігін бұйымдарын жасау, жаңбырдан қорғану бүркеніштерін дәнекерлеу, киім тігу, сондай-ақ, көкөніс өсіру өндірісі жолға қойылған.
Мемлекеттік мүлікті сенімгерлік басқаруға берудің өз ерекшеліктері бар. Атап айтқанда, келісімшартқа отырған кәсіпкер ғимарат үшін ай сайын жалдау ақысын, коммуналдық қызметтерді төлемейді. Ал нысанды басқарудан түскен таза кіріс бюджетке түседі. Себебі, мемлекеттік мүлікті сенімгерлік басқару шарты бойынша мемлекет пайда алушы болып табылады. Ал кәсіпкер тек пайда алумен шектелмейді. Ол, сондай-ақ, сенімді басқарушының нысанына күрделі жөндеу жұмыстарын жүргізу, азаматтарды жұмысқа орналастыру, өнім өндіру немесе тауарлар мен қызметтердің түрлеріне баға белгілеу сияқты шарт талаптарын орындау арқылы да пайда табады.
РИНАТ НИЗАМОВ, облыстық мемлекеттік мүлік және
жекешелендіру департаментінің бас маманы.