Дана халқымызда «жеті жұрттың тілін біл, жеті түрлі білім біл» деген нақыл сөз бар. Бүгінде көп тіл білу – заман талабы. Уақыт көшінен қалмай, біліктілігін арттырып, білімін жетілдірген Анна Ваховская сынды бәсекеге қабілетті жастардың болашағынан зор үміт күтуге болады.
Анна Ваховская – Тайынша ауданының тумасы. Вишневка сынды қазағы аз ауылда дүниеге келгенімен, мемлекеттік тілді мектепте оқып жүргенде-ақ үйреніп алған. Поляк қызының ұлы ақын Абай Құнанбаев, заңғар жазушы Мұхтар Әуезов сөйлеген көркем де бай, дана тілді үйренуге деген құлшынысына ештеңе кедергі болмады. Білмекке ұмтылған табандылығы мен зеректігінің арқасында Анна қазір қазақ тілінде еркін сөйлейді. Мемлекеттік тілді жетік меңгерген жас маман өзінің білгенін өзгелерге үйретуде.
– Қазір мен өзім сияқты өзге этнос өкілдерінің балаларына қазақ тілі мен әдебиеті пәндерінен сабақ беремін. Құлшыныс пен ынта болса, кез келген тілді үйреніп алуға болады. Мектепте оқығанда менің қабілетімді байқап, зейінімді ашқан ұстазым Гүлзада Құсайыноваға алғысым шексіз. Ағылшын тіліне де құштарлығым ерекше болды. Бірақ қазақ тілі жүрегіме жақын. Сондықтан орта мектепті тамамдаған соң Л.Гумилев атындағы Еуразия ұлттық университетіне оқуға түстім, – дейді Анна Ваховская.
Еліміздегі алдыңғы қатарлы жоғары оқу орындарының бірін үздік аяқтап, филолог маман ретінде еңбек әліппесін өзі білім алған мектептен бастауды жөн көрген. “Ұстазы жақсының – ұстамы жақсы” дегендей, бүгінде білікті маман бұрынғы мұғалімдерімен әріптес ретінде қоян-қолтық жұмыс істеп жүр. Аннаның өзіне қоятын талабы таудай. Биыл М.Қозыбаев атындағы СҚУ-дің ағылшын тілі мамандығын тамамдаған. Қос дипломы бар ұстаз қазір Тайынша ауданындағы Зеленый Гай орта мектебінде қазақ, ағылшын тілі пәндерінен оқушыларға сабақ береді. Ойлаған мақсатына қол жеткізген жас маман адам үшін алынбас асу, бұзылмас қамал жоқ екенін айтады. Арманға ұмтылу үшін әрекет ету де маңызды.
Ұстаз деген ұлағатты есімге лайық болуды алдына мақсат еткен мұғалім ұжымның сенімін ақтауға барынша тырысуда. Педагогикалық шеберлігін шыңдап, біліктілігін арттыруды да естен шығарған емес. Облыстық, республикалық деңгейде өтетін шаралардан қалмауға тырысады. Нәтиже де жоқ емес. Жастар арасында өткізілген “Тілдарын – 2019” байқауында жеңіске жеткен ұстаз мемлекеттік тіл саясатын насихаттауға қосқан үлесі үшін де түрлі деңгейдегі марапаттарға ие болуда. Бұл тек бастамасы ғана.
Қазақ, орыс, ағылшын, поляк тілдерінде еркін сөйлейтін Анна – ардақты жар, аяулы ана. Болашақта балаларының да қазақ тілінде білім алғанын қалайды. Оқушыларының да сенімді ақтап, жоғары жетістіктерге қол жеткізгенін армандайды. Оның айтуынша, қазір өзге этнос өкілдері арасында мемлекеттік тілді үйренуге деген құлшыныс зор. “Бірнеше тіл білу мақтан емес. Әркім өзі үшін үйренеді. Бірақ Қазақстанда тұрып, осы жерде өсіп-өнген әрбір адам мемлекеттік тілді білуге міндетті”, – дейді ол.
Ақмарал ЕСДӘУЛЕТОВА,
“Soltústik Qazaqstan”.
Суретті түсірген
Талғат ТӘНІБАЕВ.