Бүкіл адамзат баласының ұлттарға бөлініп, қауымдасып өмір сүруі, бір-бірінен ерекшеленуі – Жаратушы Алла тағаланың даналығы, мейірімі мен нығметі. Құран Кәрімнің “Хужурат” сүресінде: “Ей, адамдар! Негізінде, Біз сендерді бір ер және бір әйелден жараттық әрі сендерді бір-бірлеріңді танып, білулерің үшін халықтар мен рулар етіп жасадық. Анығында, Алланың алдындағы сендердің ең құрметтілерің – тақуаларың”, – делінген.
Бірде Айша анамыз (р.а.) Алла елшісінен (с.а.с.): “Уа, Расулалла! Менің екі көршім бар, сыйды қайсысына берейін?” – деп сұрағанда, Алла елшісі (с.а.с.): “Есігі ең жақын орналасқанына”, – деп жауап берген. Бұл хадис баршамызды өзге ұлт немесе дін өкілі болғанына қарамастан, адамдармен жақсы қарым-қатынаста болуға, мейіріммен қарауға, қайырымдылық жасауға шақырады.
Өткен демалыс күндері елімізде бір шаңырақ астында тату-тәтті күш кешіп жүрген барша халықтарды ортақ мақсатқа жұмылдыратын жарқын мереке – Рухани келісім күні аталып өтті. Осыған орай ұйымдастырылған шаралардың бірі – облыс орталығындағы “Қызылжар” қалалық мешітінде өңіріміздің дәстүрлі дін көшбасшыларының қатысуымен өткен “дөнгелек үстел” отырысы. Жиын барысында дін қызметкерлері елімізде тұрақтылық пен келісімді сақтау, этносаралық конфессия жайлы баяндамалар жасады. Әр тарап діндер арасындағы татулық, достықтың маңызы орасан зор әрі еліміздің жарқын болашағы үшін қажет екендігін атап өтті. Халқымыздың татулығы мен бірлігі еліміздің дамып, өркендеуіне септігін тигізеді. Осы байлығымызды қадірлей білу және оны жас ұрпақтың жүрегіне ұялату – баршамыздың міндетіміз.
Қасымхан ИСАЕВ,
“Қызылжар” қалалық мешітінің бас имамы.