Қазақстан тарихында алғаш рет жүгіруден “760greenkm” атты экологиялық марафон басталды. Әуесқой спортшылар 18 күннің ішінде 760 шақырымды бағындырып, еліміздің 18 қаласын жүгіріп өтпек.
“760greenkm” марафонының мақсаты – кез келген қала тұрғынына жаттығу арқылы табиғатпен үйлесім табуға болатынын көрсету. Шараның ұйымдастырушылары Ғалым Шуашев, Дмитрий Ким және Айдын Сәдібековтің айтуынша, бұл марафон отандастарымызды қоршаған ортаны қорғауға шақырады.
– Қазақстан бойынша 760 шақырымды еңсеріп, еліміздің 18 қаласына аялдайтын боламыз. Яғни, күніне 42 шақырымды еңсеруді көздеп отырмыз. Марафон барысында болашақ ұрпаққа аманат ретінде және артымызда “жасыл із” қалдыру мақсатында 760 көшет отырғызатын боламыз, – дейді Дмитрий Ким.
Саламатты өмір салтын насихаттаушылар 27 қыркүйекте Петропавлға жетіп, келесі күні Қостанайға бет алмақ. Қыркүйектің 20-сы Талдықорған қаласында басталған марафон 7 қазан күні Алматы қаласында мәресіне жетпек.
Қанат АТАМАНОВ,
“Soltústik Qazaqstan”.