Биыл Қазақстан халқы Ассамблеясы өзінің 25 жылдық мерейтойына орай “Өнеріміз саған, Қазақстан” байқауын ұйымдастырған болатын. “Дала дауысы” аталымында бас жүлдеге ие болған жерлесіміз Юлия Родионованың “Отан ана” әні қазылар алқасының ғана емес, бүгінде көптеген мәдениет жанашырларының жоғары бағасын алып отыр.
Жоғары білімді мемлекеттік тілде алған Юлия Родионова университетті бітіргеннен кейін де қазақ тілінен қол үзіп қалған жоқ. Той ұйымдастыру саласында еңбек ететін жерлесіміз жастардың некелесу рәсімін мемлекеттік тілде өткізіп жүр. Мектеп жасында вокалмен айналысқан Юлияға қазақ әндерін нақышына келтіріп айту қиындық тудырмайды.
“Шыны керек, нағыз таланттар қатысатын байқауда ән таңдау қиынға соқты. Қазақ халқының төл туындыларының біразын тыңдап, айтып көрдім. Бір күні таныс дыбыс режиссері “Отан ана” әнін орындауға кеңес берді. Мен де қарсы болмадым,” – дейді Юлия.
Осылайша, көп ұзамай дайын болған бейнебаян қазылар алқасының тарапынан жоғары бағаланып, екі бірдей байқаудың бас жүлдесіне лайық деп танылған. Өнер сайысы аяқталса да Юлияның орындауындағы әнді тыңдаған отандастарымыз оған жылы лебіздерін білдіріп жатқан көрінеді.
Юлия Родионова алдағы уақытта қазақ әндерін үлкен сахналарда шырқап, Отаны – Қазақстанның мәдени құндылықтарын насихаттауды жоспарлауда.