Өңір аумағында “Мейірімділік керуені” байқау-акциясы өтуде. Ол Қазақстан Республикасының Тұңғыш Президенті қоры және Қазақстанның іскер әйелдер қауымдастығы, “Хабар”, “КТК” телеарналарының қолдауымен жүзеге асырылып отыр. Шара қайырымдылық идеяларын насихаттап, дамытуды, белсенді азаматтық бастамаларды қолдауды көздейді.
Байқау талаптары сөз етілген брифингте “Облыстық іскер әйелдер қауымдастығы” қоғамдық бірлестігінің төрайымы Алла Писаренко демеушілік шараларында белсенді кәсіпкерлер мен азаматтардың бұған дейінгі атқарған жұмыстарын баяндады. “Бұл шара жүрегі жомарт жандардың еңбегін көрсетуге бағытталған. Олардың қайырымды істері елеусіз қалмауы тиіс, біреуге көмегін көрсетуді азаматтық позициясына балаған тұлғаларды халық, әсіресе, жастар тануы керек. Біздің өңірімізде өз Отанына, туған жеріне риясыз қызмет етіп, көмектесуді мақсат тұтқан жандар аз емес. Мәселен, біздің қоғамдық бірлестікке мүше нәзік жандар аз қамтылған отбасыларға киім-кешекпен көмектесіп, азық-түлікті тегін таратуда. Бұл бастамамыз басқа аймақтарға үлгі”, – деді ол. Сондай-ақ, бұл конкурсқа әлеуметтік проблемаларды шешуге өз үлестерін қосып, сол арқылы өзге азаматтарға үлгі болып жүрген жеке және заңды тұлғалар да қатыса алады.
Конкурсқа өтінімдер бес аталым бойынша қабылданады. Мәселен, “Асар” аталымы ұлттық салт-дәстүрлерді дамытуға өз үлесін қосып жүрген адамдарды ынталандыруға бағытталған. “Туған жер” – білім беру, экология және абаттандыру ісінде бастамашыл, “Батыл жүрек” – ерлік, қайсарлық танытқан азаматтарды топтастырады. “Мейірім жолында” аталымында қайтарымсыз көмек көрсеткен қайырымды жандар марапатқа ие болады.
Гүлбике КУБЕНОВА,
“Soltústik Qazaqstan”.