Облыстық қоғамдық кеңестің кезекті отырысы өтіп, онда Қызылжар және Мағжан Жұмабаев аудандарындағы елді мекендерді абаттандыру, Айыртау ауданындағы жергілікті маңыздағы автомобиль жолдарын жөндеу мәселелері қаралды.
Облыстық қоғамдық кеңестің мүшесі Аман Қабдөшевтің айтуына қарағанда, Мағжан Жұмабаев ауданының орталығы – Булаево қаласын абаттандыру бағытындағы жұмыстар жоспарға сәйкес жүргізілуде. Бүгінгі күні орталық алаң жөнделіп, спорт нысандары жаңғыртылып, көшелер жарықтандырылған. Мұның барлығына 180 млн. теңгеден астам қаржы бөлініп, жұмыстың сапалы орындалуы қатаң бақылауға алынған. Сондай-ақ, Лебяжье және Қарақоға ауылдық округтерінде орналасқан шаруашылық құрылымдары елді мекендерді абаттандыру жұмысына жауапкершілікпен қарап, өз үлестерін қосуда. Бұл ауылдарға апаратын жолдар да сапалы салынған.
Ал облыс орталығының іргесінде орналасқан Қызылжар ауданында абаттандыру жұмыстары көңіл көншітпей отыр. Соңғы жылдары тұрғындар саны көбейген аудан орталығы – Бескөл ауылының келбеті талапқа сай емес. Саяжолдар, балалар алаңы салынып, ескі үйлер сүрілгенімен, қаулап өскен қурай, шұрық-тесік көшелер ауылдың сиқын кетіруде. Бұл ауданда абаттандыру жұмыстарына 41 млн. теңге қаржы бөлініпті.
Қызылжар ауданының әкімі аппаратының басшысы Қуаныш Сабралинов үстіміздегі жылы жолдарды жөндеуге 500 млн. теңге қаржы бөлінгенін айтты. Қоғамдық кеңес мүшелері Прибрежный, Шахау ауылдарына барып, жергілікті тұрғындардың жол машақатын тартып жүргенін өз көздерімен көрген. Сонда қыруар қаржы бұл ауылдарға жетпей қалды ма?! Елді мекендердің проблемасына жергілікті билік те, сол жердегі шаруашылықтар да салғырт қарап отыр.
Қоғамдық кеңестің мүшесі Жарасбай Сүлейменов облыс орталығының іргесіндегі ауылдардың жағдайы осындай болса, шалғайдағы шағын елді мекендер қандай күйде деген сауал қойды.
– Облыс орталығының іргесінде орналасқан Тепличное ауылындағы жолдың ой-шұңқырын өткен жылы жауын-шашынды кезде күрекпен тегістеп, атүсті жөндеу жұмыстарын жүргізді. Қарадүрсін жөнделген жол көп ұзамай бұрынғы қалпына қайта түсті. Қазір ол жермен көлікпен өту қиындап отыр, – деген Жарасбай Қабдоллаұлы тұрғындар үшін жолдардың сапалы болғаны маңызды екенін жеткізді.
Отырыс барысында Айыртау ауданындағы жергілікті маңыздағы автомобиль жолдарын дамыту мәселесі де қаралды. Қоғамдық кеңестің мүшесі Олег Иванов бірнеше ауылды аралап, жолдың жайын бағамдаған. Мәселен, “Антоновка – Лавровка – Горное” бағыты бойынша жолдарды қалпына келтіру жұмысы бірнеше жылдан бері жүргізіліп келеді. Десек те, ауыр жүк көліктері құрылыс материалдарын тасымалдаған кезде жөнделген жолдар қайта бұзылып, бөлінген қаржы желге ұшқан. Бұл мәселе талай жылдан бері айтылып жүргенімен, әлі де шешімін таппай келеді. Бұған баса назар аудару керектігін айтқан Олег Иванов ұлттық парктер арқылы өтетін жолдардың да мәселесін көтерді. Мысалы, Арықбалық ауылынан “Солнечный VIP” демалыс орнына апаратын жол ұлттық паркті басып өтеді. Қайта қалпына келтірілген жолдың сапасы жақсы болғанымен, көлік тоқтайтын орын қарастырылмаған. Бұл келеңсіздіктің салдарынан қайғылы жағдайлар орын алуы мүмкін, сондықтан жолды кеңейту жайы өзекті болып отыр.
“Қазақстан азаматтары альянсы” заңды тұлғалар бірлестігінің вице-президенті Гамал Түзелбаев еліміздегі қоғамдық кеңестер институтының дамуына сараптама жасалатынын айтты. Сонымен қатар “Қоғамдық кеңестер туралы” Заңға өзгерістер мен толықтырулар енгізіліп, қоғамдық кеңестердің жұмысы түбегейлі жаңғыртылады.
Арайлым БЕЙСЕНБАЕВА, “Soltústik Qazaqstan”.