Петропавлда кәсіподақ ұйымы мен төтенше жағдайлар жөніндегі басқарманың мамандары жалғызбасты зейнеткерлердің үйлеріне өртке қарсы дабылқаққыштар орнатты.
Облыстық білім және ғылым қызметкерлері кәсіподағының сегіз мыңнан астам мүшесі бар. Ұйым мұғалімдердің кәсіби мерекесі қарсаңында жалғызбасты ардагерлерге сыйлық жасап, үйлеріне өрт туралы белгі беретін датчиктер орнатқызды.
Төтенше жағдайлар қызметі былтыр облыста көпбалалы және әлеуметтік жағынан аз қамтылған отбасылардың 538-іне улы газ және түтін датчиктерін орнатты. Биыл мұндай құрылғылардың 249-ы қойылды. Бұл жұмыстар әлі жалғасуда.
“Егде жастағы адамдарда есту, көру, иіс сезу қабілеті төмендейді. Қарт адам өрт кезінде түтіннің иісін сезбеуі мүмкін. Датчиктер түтін шыққан уақытта бірден хабар беріп, өртті өршітпей ерте кезден сөндіруге мүмкіндік тудырады. Өрт ошағын ерте анықтау жұрттың мүлкін, бірінші кезекте адамдардың өмірі мен денсаулығын сақтауға көмектеседі. Тұрғындарға пештерді, газ плиталарын, электр жабдықтарын пайдалану кезінде өрт қауіпсіздігі талаптарын сақтау қажеттілігі туралы жадынамалар таратылды. Сондай-ақ, оларға өрт туындаған жағдайда әрекет ету тәртібі түсіндірілді”, – дейді Петропавл қалалық төтенше жағдайлар жөніндегі басқарманың бас маманы Әсет Шайкин.
Ақерке ДӘУРЕНБЕКҚЫЗЫ.