Қазақстан коммунистік халық партиясы облыстық филиалының ұйымдастыруымен тұрғын үй-коммуналдық шаруашылығын реформалау тақырыбында “дөңгелек үстел” отырысы өтті. Оған жергілікті атқарушы органдар мен үкіметтік емес ұйымдардың өкілдері қатысып, өзекті мәселелерді талқыға салды.
Қоғам белсенділері шаһардағы күрделі мәселелерге қатысты өз ойларын үнемі ашық білдіріп келеді. “Біз осындай дөңгелек үстелдердің бірнешеуін өткізуді жоспарлап отырмыз. Бұл – алғашқысы. Мақсатымыз – шешімін таппай жүрген түйінді мәселелерге биліктің және қоғамның назарын аудару, бірлесе отырып, шешу механизмдерін табу. Бүгінгі күн тәртібіне тұрғын үй-коммуналдық шаруашылығы мәселелерінің шығарылуы кездейсоқ емес. Инфрақұрылымдардың ескіргені, тозғаны, оларды жаңарту, сол сияқты қаланы абаттандыру, көгалдандыруға қатысты өтініш-тілектер аз емес”, – деді “дөңгелек үстел” отырысын ашқан ҚКХП Солтүстік Қазақстан облыстық филиалының бірінші хатшысы Сергей Мартемьянов.
Тұрғындар түрлі кездесулерде аулаларды абаттандыруды сұрап, көлік қоятын орынның, балалар алаңдарының жоқтығын жиі айтады екен. Мұның бәрі біртіндеп шешіліп келеді. Биыл қаланы абаттандыруға көп көңіл бөлінді. Жыл соңына дейін 90-ға жуық саябақ пен гүлзар пайдалануға берілмек. Аулалар қалпына келтіріліп, асфальт төселуде.
Үкіметтік емес ұйымдардың өкілдері көгалдандыру, ағаш отырғызу, күтіп-баптау жұмыстарымен әр мекеме айналысу керек деген мәселе көтерді. Басқа да ұсыныстар қолдау тапты.
Қазақстан коммунистік халық партиясы облыстық филиалының баспасөз қызметі.