Облыс орталығындағы қазақ мектеп-гимназиясында бірер жылдан бері әкелер клубы жұмыс істейді. Бала тәрбиесін халқымыздың ежелгі озық дәстүрлері негізінде жүргізу және оны бүгінгі заманның жетістіктерімен ұштастыруды көздеген мектеп жас ұрпақтың ұлттық негізде қалыптасуына маңыз беруде.
Өкінішке қарай, қазіргі қоғамымызда бала тәрбиесімен көбіне аналар айналысуда. Дегенмен, әке тәрбиесін, әкенің орнын ешкім де алмастыра алмасы анық. Соңғы кезде осы тақырып турасында көп әңгіме айтылып жүр. Біз олардан шет қалған емеспіз. Мектебімізде әрбір оқушының отбасы жағдайын ескере отырып, олардың ата-анасымен қарым-қатынасының дұрыс болуына ұдайы көңіл бөлінеді. Осы орайда тұрақты түрде тәрбие сағаттарын өткіземіз. Отбасы мәселесін қозғайтын ақыл-кеңес беру орталығы жұмыс істейді. Мектепте өткен “Әке көрген оқ жонар” атты “дөңгелек үстел” басында ата-аналармен бірге аталмыш тақырыптың маңыздылығына тоқталып, әке мен бала арасындағы байланыстың қандай болу керектігін талқыладық. “Ең бақытты ел” қоғамдық қоры ұйымдастырған вебинарда да бәріміз отбасы мәселелерін тереңірек ұғына түстік.
Кеңестің алғашқы отырысына 7-11-сынып оқушыларының 70-ке жуық ата-анасы қатысуға ниет білдірді. Арнайы өткізілген тренинг барысында қатысушы әкелер бір-бірімен достық қарым-қатынас орнатып, клуб жұмысын ұйымдастыруда өз пікірлерін жеткізді. Сондай-ақ, бұрынғы және қазіргі уақытты салыстыру, заманауи әкелердің отбасындағы орнын талдау арқылы тың жобаларымен бөлісті. Клубтың жылдық жоспарына сәйкес әкелер алдағы уақытта оқушылармен ақпараттық-танымдық спорттық шараларда бас қосып, ерекше назар аудару қажет балалармен бірлескен жұмыстар жүргізетін болады.
Психологтар анықтағандай, отбасы мүшелері бір-бірімен жақын қарым-қатынас орнатқан жағдайда ұрыс-керістен аулақ болады. Әке тәрбиесін алған ер бала қажырлы, өжет болып өседі, ал әкесін үлгі тұтқан қыздар өзінің ертеңгі өмірлік серігі болатын жолдасын таңдауда қателіктерге ұрынбайды. Әсіресе, жастайынан баланы еңбекке баулудағы әкенің рөлі жоғары. Мамандық таңдауда да ер балалар олардың ақыл-кеңесіне құлақ түруі тиіс. Осы орайда айтарым, баланы бұйырып жекіп емес, дұрыс ақыл-кеңес бере отырып тәрбиелеген абзал. Өйткені, шектен тыс қаталдық танытып, шеттете берсе, бала қорқақ болып өсуі әбден мүмкін.
Амангелді ТҰРАЛИНОВ,
қазақ мектеп-гиназиясы жанындағы әкелер мектебінің мүшесі.
Петропавл қаласы.