Облыс орталығының санитарлық жағдайын қамтамасыз етумен, коммуналдық қалдықтарды тасымалдаумен, қаланы көркейтумен және көгалдандырумен айналысатын “Петропавл-Коммунхоз” ЖШС-нің жарғылық капиталы сомасы 58 млн. теңгенің алты әмбебап техникасымен толықты. Облыс әкімі Ерік Сұлтанов шетелдік техникаларды арнайы барып көрді.
– Біздің автопаркіміз “КамАЗ” шассиіндегі “МД-651” құрама-жинау, “КО-318А” вакуумды сыпырып-жинау машиналарымен, аспалы құрал-жабдығы бар 2 “МКСМ-800Н” минитракторымен, “ПКУ-0,8”, “ПКУ-0,8-5” қондырғылары орнатылған 2 “МТЗ-82,1” тракторымен толығып отыр. Жарғылық капиталды толықтырған 6 техникаға 58 млн. теңге қаржы жұмсалды. Олардың құрал-жабдықтары Ресей Федерациясының “Қорғандормаш” ААҚ-да шығарылған, ал “Беларусь” тракторлары өзіміздің Қазақстанда құрастырылған. Бұл техника жұмысымыздың тиімділігін арттыруға барынша көмек көрсететін болады, – дей келіп, “Петропавл-Коммунхоз” ЖШС-нің директоры Мұрат Қалиев Ерік Хамзаұлына өз кәсіпорны туралы ақпарат берді. Мұрат Бопашұлының айтуына қарағанда, аталмыш кәсіпорын 2012 жылы 26 желтоқсанда құрылған. Шаруашылықтың құрылыс-құрастыру жұмыстарына да лицензиясы бар. Бүгінгі күні серіктестікте 377 адам еңбек етеді, оның 296-сы – қоғамдық жұмысқа жіберілгендер, негізгі штат – 81 адам. Орташа айлық еңбекақы – 75265 теңге.
Кәсіпорында 20 техника, әртүрлі мақсаттағы бірнеше аспалы құрал-жабдықтар жиынтығы, тракторға орнатылған 2 роторлы шөпшапқыш, бензинмен жұмыс істейтін аралар, газон-шапқыштар, мотокультиваторлар бар, тек қоқыс таситын машинаның өзі – 15. Серіктестік құрылғаннан бері шнекроторлы қондырғы, өрнектас өндірісіне арналған жабдық, “ЗИЛ” базасында жасалған 24 метрге дейін көтеретін автогидрокөтергіш, қоқыс шығару үшін 150 жаңа контейнер сатып алған.
Нұрсайын ШӘРІП,
“Солтүстік Қазақстан”.