Өңірімізде жұмысшы мамандықтарына қызығатын жастардың саны жыл санап артып келеді. Қол жұмысынан қаймықпаған жерлестеріміздің бірі – Аққайың ауданындағы Полтавка ауылының тумасы Аманжол Шауқаров.
Ол – Петропавл құрылыс-экономикалық колледжінің 3-курс студенті. Дәнекерлеуші, сылақшы, кондитер сияқты мамандарды даярлайтын колледжде кеңпрофильді құрылыс шебері мамандығы бойынша оқып, тұрғын үй және өндірістік нысандарды салудың әдіс-тәсілдерін үйренуде. Яғни, ол дәнекерлеу, тас қалау, сылақ, бетонмен және арматурамен жұмыс істеудің қыр-сырын меңгеруде. Колледж басшылығы студенттерді әрдайым облыс орталығындағы кәсіпорындарға өндірістік тәжірибеге жібереді. Аманжол “Пилон” жауапкершілігі шектеулі серіктестігінде біліктілігін шыңдауда.
– Құрылысшы – мәртебелі мамандық. Жылы да жайлы баспана салған құрыш қолды жұмысшылардың еңбегі ешқашан елеусіз қалған емес. Маңдай тердің өтеуі – еңбекақысы да жоғары. Қазіргі таңда өңірімізде тас қалаушылар мен дәнекерлеушілерге сұраныс артып отыр. Сондықтан екі қолға бір күрек таппай жүрген жастар жұмысшы мамандығын меңгерсе ұтылмайды, – дейді Аманжол Шауқаров.
Нұржан СЕЙІЛБЕКОВ, “Soltústik Qazaqstan”.
Суретті түсірген Талғат ТӘНІБАЕВ.
СУРЕТТЕ: А.Шауқаров жұмыс үстінде.