Облыс әкімі Ғауез Нұрмұхамбетов “PROSOL” компаниясының басқарушы директоры Даниэле Бонвичинимен кездесті. Италиялық инвестор Петропавлдағы “Qyzyljar” арнайы экономикалық аймағында азықтық ашытқы шығаратын зауыт салуды жоспарлап отыр.
Италиялық компания арнайы экономикалық аймақ қатысушысы ретінде биылғы жылдың қараша айында тіркелген. Еуропадан келген инвестор мейман отандық кәсіпкермен бірлесе өңірге 1,5 млрд. теңге көлемінде инвестиция салмақшы. Негізгі мақсаты – азықтық ашытқы зауытын салу. Әзірге мұндай тауарды облыста бірде-бір кәсіпорын шығармайды. Бұл өнім жануарларға, құстарға және балықтарға биоқосымша ретінде беріледі. Сонымен қатар құрамажем дайындау кезінде қолданылады екен.
– Әлем бойынша мұндай өндірісті оң жолға қойған төрт-ақ компания бар. Соның бірі – біздің кәсіпорын. Солтүстік Қазақстан облысы аграрлы аймақ болған соң осындай азықтық ашытқы жоғары сұранысқа ие. Мемлекет бірнеше алпауыт елдермен шекаралас орналасқан. Облыс экономикалық тұрғыдан бизнес жүргізуге қолайлы. Осы факторларды ескеріп, зауыт салуға ниеттіміз, – деді “PROSOL” компаниясының басқарушы директоры Даниэле Бонвичини.
Облыс әкімі Ғауез Нұрмұхамбетов өңірдің ауыл шаруашылығы саласындағы мүмкіндіктерін айтып, инвесторларға жасалатын жағдайды баян етті.
– Шетелдік ірі компания біздің өңірді таңдап, іс бастағалы жатқаны қуантады. Мен сіздердің зауыттарыңызбен танысып шықтым. Өз тарапымыздан қолдау көрсетуге дайынбыз. Жұмыстарыңызға сәттілік тілеймін! – деді облыс әкімі Ғауез Нұрмұхамбетов.
Жоспар бойынша өндіріс ошағының құрылысы 2024 жылдың көктемінде басталады. Зауыт 2025 жылы іске қосылмақшы. Тың жоба жүзеге асырылса, 40 жаңа жұмыс орны ашылып, дайын өнім толығымен шетелге экспортталады. Бүгіндері инвесторлар М.Қозыбаев атындағы Солтүстік Қазақстан университетінің басшылығымен келіссөздер жүргізуді қолға алды. Жоғары оқу орнында жаңа кәсіпорынға қажет мамандар даярланбақшы.
Байболат ҚҰЛТАНОВ.