Кәкімбек Салықов көзі тірісінде қазақтың ән атасы атанған әнші, ақын әрі композитор Біржан сал Қожағұлұлының өмірі мен шығармашылығын көп зерттеген, өлең-жырларын көзінің қарашығындай көріп жинап, кітап қылып шығаруды жоспарлап жүрген болатын. Алайда, беті қатталып, баспаға беруге дайын тұрған жинақты шығаруға дәм-тұзы жетпеді.
Бұл кітап 2016 жылы Солтүстік Қазақстан облысының әкімі Ерік Сұлтановтың қолдауымен “Фолиант” баспасынан жарық көрді. Кәкімбек Салықов жаңа еңбегінде: “Біржан – қазақ халқының ұлттық мәдени-рухани өресінің өсуіне бел байлап атсалысқан, зердесіне ұлттық мүдде, ұлттық мінез сіңген әділдіктің жалауындай қайсар тұлға. Ол – халқымыздың ұлттық санасын оята түсіп, ел бірлігіне тұтқа болған, қайғысына қабырғасы қайысқан, озық ойлы ақыл иесі”, – деп жазады.
Кітап Кәкімбек Салықовтың “Біржан сал жайлы толғаныс” деп аталатын мақаласымен ашылған. Ал соңғы сөз ретінде белгілі ғалым, әйгілі батыр Мәлік Ғабдулиннің мақаласы берілген.
Ербақыт АМАНТАЙҰЛЫ,
“Солтүстік Қазақстан”.