“Береке басы – бірлікте” деген халық даналығын ұлықтаған Қазақстан халқы Ассамблеясының құрылуы Елбасының көрегендік саясаты екені сөзсіз. Мемлекет басшысы өзі атап көрсеткендей, бүгінгі күні Қазақстан халқы Ассамблеясы таза қазақстандық саяси жаңашылдықтың нәтижесінде қалыптасқан өзіндік бірегей институт деңгейіне көтерілді. Ол этносаралық және конфессияаралық келісімнің басты тетігі ретінде ел дамуында маңызды рөл атқаруда.
Ассамблея құрылғаннан бері Қазақстанда қоныстанған өзге этнос өкілдері бір шаңырақтың астына бірігіп, Елбасымыздың тапсырмасы бойынша ортақ үйіміздің әлемдегі алдыңғы қатарлы дамыған отыз елдің қатарынан көрінуіне атсалысып келеді. Бейбітшілік пен рухани келісімді жастардың бойына дарыту мақсатында еліміздің бірқатар жоғары оқу орындарында Қазақстан халқы Ассамблеясының кафедралары ашылды. Мұндай кафедра біздің университетте 2014 жылы шаңырақ көтерді.
Кафедра жұмысының негізі мақсаты – студенттерді діни сауаттылыққа, рухани адамгершілікке, патриоттық тәрбиеге баулып, шығармашылық қабілеттерін дамыту. Сонымен қатар, әлемді мойындатқан этносаралық татулық пен дінаралық келісімнің қазақстандық үлгісі жоғары оқу орнында зерттеле бастады. Кафедрада профессорлық-оқытушылық құрамнан және қоғамдық ұйымдар өкілдерінен жасақталған этносаралық мәселелермен айналысатын ғылыми-әдістемелік бірлестік құрылды.
Қазақстан халқы Ассамблеясы кафедрасының қызметкерлері оқу ордамыздың ғылыми-әдістемелік жұмысының сапасын көтеруге атсалысуда. Студенттерге “Этностық-конфессияаралық келісімнің қазақстандық моделі” және “Дінтану” курсы оқытылады. Бүгінгі күні еліміздің барлық жоғары оқу орындарында 20-дан астам әдістемелік құралдар жасалып, оқу үдерісіне енгізілуде. Қазақстан халқы Ассамблеясы кафедрасының алдында тұрған кезекті міндет – “Мәңгілік ел біздің құндылығымыз” атты пәнді әзірлеп, оны оқу үдерісіне енгізу болмақ.
Бүгінгі күні кафедраның мамандары ай сайын ғылыми-тәжірибелік семинарлар мен вебинарлар өткізеді. Бұл шаралар студенттердің туған тілдеріне деген қызығушылығын оятуға, этнобірлестіктердің жұмысына байланысты құжаттарды жүргізуге, діни сауаттылық пен рухани адамгершілік, шығармашылық қабілеттерін дамытуға, патриоттық тәрбиені қалыптастыруға бағытталған.
Өз қызметін ғылыми-әдістемелік және ғылыми-зерттеу жұмыстарымен ұштастырған кафедра мүшелері “Солтүстік Қазақстан облысының мұражайы”, “Әлемдік және дәстүрлі діндер көшбасшыларының съезі”, “Қонақжай Қызылжар” атты виртуалдық көрме ұйымдастырды. Ғылыми-әдістемелік жұмыстарға кафедраның оқу үдерістерін үйлестіру және оның сапасына бақылау жасауы, оқу бағдарламаларын әзірлеуге қатысты ұсыныстар енгізуі жатса, ал ғылыми-зерттеу жұмыстарына ғылыми жобаларды жүзеге асыруға ықпал ету және тағы да басқа мәселелер кіреді.
Кафедраның ұйытқы болуымен өткен жылы өңірімізде мәдени орталықтар өкілдерінің, студенттер мен қала жастарының басын қосқан өнер сайыстары, танымды іс-шаралар ұйымдастырылды. Атап айтқанда, “Менің сан қырлы Қазақстаным” облыстық фотосуреттер онлайн-сайысын, “Бір мемлекет – бір отбасы”, “Қазақстанға қалай тап болдым?”, “Патриот деген…”, “Тегі әртүрлі – теңдігі бір”, “Тәуелсіздік тұғыры” атты эсселер, “Менің Отаным – Қазақстан” атты жобалар байқауы өтті.
Мемлекеттік, ұлттық саясатты жүзеге асыруды, этносаралық келісімді нығайтуды негізге алған кафедрада студенттердің ғылыми қоғамы құрылды. Қоғам мүшелері республикалық, өңіраралық ғылыми жобаларға, семинарларға, конференцияларға және “дөңгелек үстелдерге” қатысады. Студенттердің өзін-өзі басқаруын жандандыру үшін ғылыми қоғамның үш мүшесі “Қазақстан халқы Ассамблеясы” кафедрасының ғылыми-әдістемелік бірлестігінің құрамына енгізілді.
Сондай-ақ, кафедра – еліміздегі Қазақстан халқы Ассамблеясы кафедралар қауымдастығының, ғылыми-сарапшылық кеңесінің, Президент жанындағы “Қоғамдық келісім” республикалық мемлекеттік мекемесінің белсенді мүшесі. Бүгінде кафедраның студенттер арасында толеранттылықты қалыптастыруда алатын орны ерекше. Себебі, бейбітшілік және келісім орталықтарының, ғылыми-зерттеу институттарының құрылуы елімізде этносаралық және конфессияаралық келісімге баса назар аударылып отырғанын көрсетеді.
Студенттік ассамблея құрамындағы түрлі этнос өкілдері университет, аудан, қала, облыс, республика көлемінде өткізілетін мәдени іс-шараларға үнемі қатысып, оларды өткізуге белсене атсалысып келеді. Мәселен, білім ордасының студенттері Андрей Хорошенко және Ирина Приймак жаратылыстану-техникалық, әлеуметтік-гуманитарлық ғылымдар бойынша республикалық байқауда үшінші дәрежелі дипломмен марапатталды.
М. Қозыбаев атындағы СҚМУ-дің бүгінгі мәдени өмірінде студенттік ассамблеяның алатын орны ерекше. Алдағы кезеңге де жоспарлап отырған шараларымыз аз емес. Атап айтқанда, үстіміздегі жылдың наурыз айында “Мейірімділік көші” бейнефильмі мен жылнамасын жасауды, қайырымдылық күндерін, “Жүректен – жүрекке” атты кездесулер ұйымдастыруды, оқу үдерісіне Елбасымыздың өмірі мен қызметі туралы арнаулы курстар мен семинарлар енгізуді жоспарлап отырмыз.
Людмила ГРИВЕННАЯ,
М. Қозыбаев атындағы Солтүстік Қазақстан мемлекеттік университеті Қазақстан халқы Ассамблеясы кафедрасының меңгерушісі, тарих ғылымдарының кандидаты.