Жақында әлеуметтік желіден Парламент Мәжілісінің депутаты, жерлесіміз Кәрібай Мұсырманның “Құрметті азамат” атағын беруді доғарсақ қайтеді, деген жазбасын оқыдым.
“Жер сатушы” атанған әкім де, парақорлығының исі мүңкіп тұрғаны үшін қызметінен түсірілген судья да, тіпті, өңір басшысына “оңды” бата берген дарынсыз журналист те, облыс әкіміне кандидаттық диссертация жазып берген ғалым да “Құрметті азамат” атанғанын жұрт күлкі етіп айтып жүр”, – деп ашыныпты халық қалаулысы. Шынымен де, осы құны қалмаған атақты беруді тоқтататын уақыт келген сияқты. “Оның орнына бәленбай ауданның және бәленбай облыстың “Құрметті меценаты” немесе “Атымтай жомарты” деген жаңа атақ енгізсек қалай болады? Мұндай атақты туған ауылдарына миллиондаған теңгенің әлеуметтік-мәдени ғимараттарын салып берген кәсіпкер азаматтарға және басқа да байларға берсек… Бәлкім, сонда жергілікті басшыларға әркімді салып, атақ сұраушылық мүлдем тыйылар. Ал жаңа атақтың жөні бөлек қой. Даңғой ағайындарға атақ керек болса, атамекендеріне қол ұшын берсін” деген Кәрібай Иманжанұлының бастамасы көпшіліктің көкейіне қонымды. Мен Мағжан Жұмабаев ауданындағы Ноғайбай ауылының азаматы Алтынбек Сапаровтың, Мамлют ауданындағы Меңгесер ауылына Еркебұлан Мәмбетовтің, Аққайың ауданындағы Дайындық ауылына Біржан Шәймерденовтің жанашырлығын көріп, сүйсінемін.
Марат САҒИТҰЛЫ,
Жамбыл ауданының тұрғыны.