“АДОН-Север” қоғамдық бірлестігінің ұйымдастыруымен “Қызылжар” мейрамханасында мүмкіндігі шектеулі балаларға арналған жаңажылдық қайырымдылық шарасы өтті.
Денсаулығында кінәраты бар балаларды қолдауды, олардың өздерін қоғамның толыққанды мүшесі ретінде сезінулеріне жағдай туғызуды көздеген қайырымдылық шарасы осымен жетінші жыл қатарынан өткізілуде. Оған 120-ға жуық ересектер мен балалар қатысып, мейірім шуағына бөленді.
Жаңа жыл мерекесінің сиқырлығына сенетін балалар үшін бұл қуанышты күннің орны ерекше. Шараның ашылу салтанатында қоғамдық бірлестіктің төрайымы Елена Колмогорова балаларды Жаңа жылмен құттықтап, жылы лебізін білдірді. Кеш барысында қонақтарға жаңажылдық қойылым көрсетіліп, ересектермен бірге балалар да бір адамдай қатысып, көңіл көтерді.
Сонымен қатар, кеш барысында әртүрлі ойындар ұйымдастырылып, әсем əннен шашу шашылды. Мүмкіндігі шектеулі жандарға арнайы ұйымдастырылған шара соңында балаларға сыйлықтар үлестірілді.
Айгүл ХАМЗИНА,
“Солтүстік Қазақстан”.