Петропавл қаласының әкімі Болат Жұмабеков саяжай қауымдастықтарының төрағаларымен кездесті, деп хабарлайды Qyzyljarnews.kz тілшісі.
Кездесу барысында саяжайларға қатысты өзекті мәселелер талқыға түсті.
– Бағбандар саяжай маусымы басталысымен кіреберіс жолдарды жөндеу және тегістеуге қатысты мәселелерді айтты. Сонымен қатар, бау — бақша серіктестіктеріне автобус қатынату, электр және сумен жабдықтау, бейнекамералар орнату, қоқыс шығару, ағын су кәріздерін тазарту мәселелері талқыланды, – деп жазды қала әкімі Болат Жұмабеков өзінің «Facebook»-тегі парақшасында.
Қала аумағында 173 бау-бақша серіктестігі бар. Соның 96-сы сумен қамтамасыз етілген. Су белгіленген кестеге сәйкес беріледі. Ал электр энергиясы саяжайлардың 90-на тартылған.
Әкімдіктің баспасөз қызметінің хабарлауынша, саяжай маусымы басталар алдында кіреберіс жолдарды грейдерлеу жүргізіледі. Биыл арнайы бекітілген кестеге сәйкес, 19 бау-бақша бағыты бойынша жұмыс атқарылады. Қала әкімдігі саяжай иелерінің ұсыныстарын ескере отыра, автобустардың қозғалыс кестесін әзірледі.