Облыс орталығында жұмыс істеп тұрған бірінші көтергіш сорғы стансасы 1974 жылы пайдалануға берілген болатын. Былтырғы су тасқыны кезінде қуат беретін электр желісінің бағандары құлап, аталмыш нысан қатты зақымданған. Салдарынан баламалы резервтік станса арқылы тұрғындарды ауызсумен қамтамасыз етуге тура келген. Үкімет тарапынан қалпына келтіру туралы шешім қабылданып, осыған орай жобалық-сметалық құжаттар әзірленді, «RAZ Mineral Demeu» корпоративтік қорының демеушілігімен 2,9 млрд. теңге бөлінді. Осылайша маңызды инфрақұрылымдық жоба шеңберінде бірінші сорғы стансасы қайта жаңғыртылып, бағдарлама сәтті жүзеге асырылды. Жөндеу жұмыстарына 70-ке жуық адам жұмылдырылды. Атқарылған жұмыстармен, атап айтқанда, қайта құрудың негізгі нәтижелерімен өңір басшысы Ғауез Нұрмұхамбетов танысты.
Нысанға су астында да тоқтаусыз жұмыс істей алатын заманауи еуропалық сорғы жабдықтары орнатылды. Дизель генераторы ғимараттың жоғары бөлігінде су басудан қорғайтын деңгейде орналастырылды. Басқару пульті де қауіпсіз биіктікке қойылып, қашықтан басқару режімінде жұмыс істейді. Биіктігі 4,7 метрге дейін жететін темірбетонмен күшейтілген габион бөгеті салынды. Тұрақты электрмен қамтамасыз ету мақсатында төрт әуе желісі қалпына келтірілді, сондай-ақ жер астымен екі резервтік кабель тартылды.
Ғауез Торсанұлы жаңартылған нысанның су тасқыны қатеріне төзімділігі жақсарып, қалалықтарды тұрақты ауызсумен қамтамасыз ететінін атап өтті. Бірінші көтергіш сорғы стансасы қаланы тіршілік нәрімен қамтамасыз етіп отырған негізгі ауызсу көзі болып қала бермек. Сумен қамту жүйесінің тұрақтылығын арттыру үшін Ойқала шағынауданында қосымша сорғы стансасын салу жоспарланып отыр. Бұл жоба барлық су инфрақұрылымының үздіксіз жұмыс істеуін қамтамасыз етіп қана қоймай, төніп тұрған қауіптерден құтылуға да мүмкіндік береді.
Өмір ЕСҚАЛИ,
«Soltüstık Qazaqstan».