Жақында Петропавлдағы облыстық тарихи-өлкетану мұражайында жерлесіміз, суретші Станислав Алерттің жеке көрмесі өтті. Талантты жігіт шаһар тұрғындарына өзінің 30-дан астам туындысын ұсынды.
Ол – Петропавлдағы Бәйкен Әшімов атындағы темір жол көлігі колледжінің түлегі. Станислав білім ошағында машинистің көмекшісі мамандығы бойынша оқыса да, болашағын суретшілікпен байланыстыруды жөн көрді. Ол суретшілікпен қатар би билеумен де шұғылданады. Осыдан бес жыл бұрын қалада “PETRO-POWER” би мектебін ашқан ол былтыр Ресейде өткен “Танцы на ТНТ” белгілі тележобасына қатысып, көрерменнің ықыласына бөленді. Талапты жас сол жылы өңірімізде өткен “Минута славы” байқауында брэйкданс биін және сурет салу өнерін паш етіп, бас жүлдеге лайық деп танылды.
Көрме күні жас дарынның шығармашылығымен танысуға келгендердің қарасы қалың болды. Қылқалам иесі көрмеге тыңғылықты дайындалған. Қабырғаларға ілінген суреттердің барлығын жарты жылдың ішінде салыпты.
Станиславтың шығармашылық жолындағы ең бірінші қолдаушысы – анасы Маргарита Алерт.
– Ұлым кішкентайынан сурет салуға әуес болды. Бірақ туындыларын бізге көрсетпейтін. Әсіресе, үйде ем-дом алып жатқанда түрлі сурет салумен уақыт өткізетін. Бір байқағаным, оның жан дүниесінен шыққан жұмыстары тапсырыс бойынша салатын суреттерден кем емес, – деді Маргарита Алерт.
Станислав Алерт – “Street art” акциясы аясында нашақорлыққа қарсы күреске жұмылдырылған жастардың бірі. Жаздың басында ол облыс орталығындағы Казахстанская правда көшесі, 120 мекенжайында орналасқан көпқабатты үйдегі арканы өзінің көркем туындысымен безендірген. Бұл – оның есірткіге қарсы күрес тақырыбына арналған екінші жұмысы. Талантты жігіт есірткі жарнамалары жазылған қабырғаға балалар мен жас ананың портреттерін салған. “Маған полиция қызметкерлерімен бірлесіп жұмыс істеген ұнады. Осылайша, мен қоғам дертімен күреске өз үлесімді қосып жатқаныма қуаныштымын”, – дейді суретші.
Нұржан СЕЙІЛБЕКОВ, “Soltústik Qazaqstan”.