Петропавлда “Worldskills Kazakhstan” чемпионатының облыстық кезеңі басталды. Үстіміздегі жылы байқауға қатысуға өңірдің 20 колледжі ниет білдірген. Дода 15 күнге созылады.
Сегізінші жыл қатарынан ұйымдастырылып отырған байқауға 160-тан астам студент қатысып жатыр. Сайыс 23 бағыт бойынша өтуде.
– “WorldSkills Kazakhstan” өңірлік чемпионатына қатысушы студенттер түрлі бағыттар бойынша өз шеберліктерін көрсетулері керек. Барлық студенттерге бірдей тапсырмалар берілді. Аспаздар, құрылысшы мамандығында оқитындар өз араларында мықтыны анықтайды, – дейді облыстық білім басқармасының бөлім басшысы Бауыржан Зейнуллин.
Сайыстың алғашқы күні құрылыс саласына арналды. Студенттер 4 бағыт бойынша: кірпіш қалау, дәнекерлеу, плита қалау мен сантехника бағытында сынға түсті.
Ренат Кириченко – жоғары құрылыс-экономикалық колледжінің 3-ші курс студенті. Оның айтуынша, кірпіш қалау ісін тыңғылықты атқару керек. Жас жігіт жақсы нәтиже көрсетті.
– Кірпіш біркелкі болуы қажет. Бағалау арнайы талаптар бойынша жүргізіледі. Яғни тегістігі, түзулігі мен әрлеу сапасы қаралады. Үміткерлерге 5 сағат уақыт беріледі. Бірінші кезеңде жақсы нәтиже көрсеттім. Облыстық кезеңнен сүрінбей өту үшін аянып қалмаймын, – дейді жас өрен.
Байқау жергілікті 8 колледжде өтуде. Облыстық кезеңнен сәтті өткен жастар маусым айында республикалық сайысқа қатысады. Ол Астана қаласында ұйымдастырылмақ.
Рабиға ЕРАЛЫ,
“Soltüstık Qazaqstan”.