Әсет Қожахметов – Айыртау аудандық мәслихатының №4 сайлау округі бойынша депутаты, ауданның әлеуметтік-экономикалық дамуы және бюджет мәселелері жөніндегі тұрақты комиссияның төрағасы. «AMANAT» партиясы аудандық филиалының төрағасы.
Не үшін депутат болдым?
Мен осы ауданның тумасымын. Еңбек жолымды да туған жерімде бастадым. Менің мамандығым педагог болғанымен, бұл салада көп еңбек еткен жоқпын. Ауданда жастар бастамалары орталығы ашылып, сонда жұмыс істедім. Одан кейін аудан әкімінің жастар саясаты жөніндегі кеңесшісі болдым, әкімнің көмекшісі, аппарат басшысы болып қызмет еттім. Қызмет барысымен әкіммен бірге жүреміз, қоғамдық қабылдауларға қатысамыз. Сол кезде түрлі мәселелерді көріп, біліп, тұрғындармен қалай жұмыс істеу керектігін үйрендім. Яғни мемлекеттік қызметте жүріп шыңдалдым. 2020 жылы қараша айында «AMANAT» партиясының аудандық филиалының төрағасы қызметіне ауыстым. Бұл жерде де тұрғындарды толғандырған мәселелердің түйінін тарқатуға тырысып жатырмыз. Сондықтан осы білімім мен тәжірибемді пайдалана отырып, халыққа пайдам тисін деген ниетпен депутат болуға бел байладым.
Сайлаушыларға қандай уәде бердім?
Мен сайлауға «AMANAT» партиясының атынан түстім. Ауыл-ауылды аралап, тұрғындармен кездескен кезде, яғни сайлауалды үгіт-насихат барысында 94 өтініш түсті. Олар біздің партияның бақылауына алынды. Ауылдағыларды әдеттегідей су, жол, жарық мәселелері толғандырады. Қазіргі таңда сол кезде көтерілген мәселелердің дені шешімін тапты. Мен №4 сайлау округінен бөлек Бірлестік, Красногорка ауылдарына жауаптымын. Өзім аудан орталығына жақын Новоукраинка ауылында тұрғандықтан сол жаққа жауапты депутатпен бірлесіп, туындаған мәселелерді шешуге көмектесемін. Бірлескен жұмыстың арқасында Новоукраинкада бірқатар мәселелер шешілді. Депутаттық міндет – халықпен бірге атқарылатын жұмыс болғандықтан, менің округім, се-нің округің деген жоқ. Көмек сұраса, қолдау көрсетуге даярмыз. Маған қарасты сайлау округіндегі бес мыңдай тұрғынның талап-өтінішіне құлағым түрік. Саумалкөл тұрғындарының әлеуметтік желідегі чаттарына қосылғанмын. Тұрғындар сол жерде де мәселелерін тікелей жазып жатады.
Аудан территориясының көп бөлігі ұлттық парк қарамағында. Бұның жақсылығы мен қиындығын қатар сезініп отырмыз. Мысалы, ұлттық парк аумағындағы қиыршық тас карьерлерін пайдалану заңға қайшы. Осы жылдың басында елордада барлық деңгейдегі мәслихаттар депутаттарының республикалық форумы өтті. Сол шараға баратын депутаттар қандай мәселені көтеретінімізді алдын ала келісіп алдық. Депутаттар министрлерге тікелей сұрақтар қойды. Сол кездесуде экология және табиғи ресурстар министрі Ерлан Нысанбаевқа карьерлерді ұлттық парктің аумағынан шығару туралы ұсыныс айттық. Қазір қарастырылып жатыр.
Қай уәдемді орындадым?
Аудан орталығындағы Умышов, Нефтебазовский көшелерінің тұрғындары ауызсу мәселесін көтерді. Ол жақта су тарату құбырлары да, колонкалар да жоқ. Биыл қаржы бөлініп, ұңғыма жасалды. Жалпы аудан орталығын сумен қамту бірнеше кезеңге бөлінген. Аталған көшелерге де болашақта құбыр тартылуы тиіс. Республикалық бюджетке қарап отырғандықтан, болашақта шешіледі дегеніміз дұрысырақ болады. Менің округімде жол мәселесі қиын. Биыл аудан орталығындағы 14 көшеге қиыршық тас төселді. Соның төртеуі – менің округімдегі көшелер. Жалпы Саумалкөл ауылында 11 мың адам тұрады. Солардың өтініш- тілектері, көтерген мәселелері бойынша бес депутат жұмыс істейді.
Красногорка ауылында да жол сапасыз. Биыл әкіммен келісіп, жолды тегістедік. Енді- гі жылы жобалық-сметалық құжатын әзірлеп, қиыршық тас төсету керек. Ал асфальт тым қымбат.
Саумалкөл ауылында әлі де шешімін күткен мәселелер бар. Қаржы бөлінген кезде бес депутат ауылды аралап, не керек екенін сұрап, тұрғындардың өтініштерін есепке алдық. Олардың өтініштеріне сәйкес көшелерге 100-ден астам шам орнатылды. Тұрғындар балалардың ойын алаңын сұрады. Оған 10 млн.теңге бөлінді, мердігер өз қалтасынан 7 млн. теңге қосып, үлкен ойын алаңын салып берді.
Депутаттық міндеттерімізден бөлек қайырымдылық жасау, жанашырлық таныту да басты міндетіміз. Аудан орталығында жалғызілікті ерлі-зайыпты тұрады. Әуелде олардың жер үйі болды. Кейін оны сатып, пәтерге көшті. Аудандық мәслихаттың төрағасымен бірге әлгі кісілердің жағдайын білуге барсақ, үйлерінің төбелерінен су ағып тұр. Оны жөндейтіндей қаражаттары жоқ, зейнетақыға қарап отырған жандар ғой. Жеке үйді жөндеуге мемлекет тарапынан да ақша бөлінбейді. Сосын көршілермен ақылдасып, демеушілер тауып, құрылысшыларды шақырып, шатырын жөндеп бердік. Жекелеген адамдардың мәселесін шешуде демеушілерді іздеп, солардың қолдауымен қамқорлық таныту үрдіске айналған.
Халық маған сене ме?
Тұрғындармен кездескен кезде олар көтерген мәселенің шешілетініне сенімді болмасам, бос уәде бермеймін. Осы күнге дейін сайлаушыларды алдаған емеспін, сондықтан олар маған сенеді деген ойдамын. Қабылдау кезінде бір сұраққа толыққанды жауап бере алмасам, кейін оны зерттеп, зерделеп, міндетті түрде қайта хабарласамын. «AMANAT» партиясының аудандық филиалына жұмысқа ауысқан кезде, әлеуметтік желілер арқылы жұмыс істеуге көштік. Алдымен газеттер мен әлеуметтік желілер арқылы ұялы телефонымның нөмірін жарияладым. Осы арқылы тұрғындар үшін тәулік бойы ашық екенімді көрсеттім.
Жалпы халықтың көңілінен шықпаған депутаттың мандатын қайтарып алу тәртібі – өте дұрыс шешім. Осыны тұрғындармен кездескен кезде үнемі айтып отырамын. Депутатқа еңбекақы төленбейді, ол жеке бастамасымен жұмыс істеуі керек. Халықтың өтініш-тілегін елемей, уақытын босқа өткізетіндер депутат бола алмайды. Ата заңымызда да ең жоғарғы билік – халықта екені жазылған.
Қазіргі билік те, депутаттар да халықпен санасу керек еке- нін жақсы түсінеді. Соңғы жылдары азаматтық қоғамның белсенділігі артты. Қоғамның кез келген саласына қатысты ой- пікірді еркін жет-кізе алатын жағдайға жеттік. Жалпы әділетті Қазақстанды орнықтыру ісіне қоғам, әрбір азамат жауапты. Мемлекет қоғамның таңдауына байланысты дамиды. Осыны ұғынбайынша, біз шынайы, демократиялық, билік тармақтарының тепе-теңдігі сақталған, адам құқы мен сөз бостандығын толықтай қамтамасыз ететін мемлекет құра алмаймыз. Депутат ретінде сайлаушыларыммен кездескен кезде осы мәселеге баса мән беремін. Сайлаушылар белсенді болса, депутаттың да ісі өнік. «Жалғыздың үні, жаяудың шаңы шықпас», – демекші, депутаттың жалғыз-жарым жүріп түйінді мәселені шешуі қиын. Ал ортақ істі еңсеруде сайлаушылармен бі-ріксе, оны ашық талқылап, тиісті органдарға сауатты түрде жеткізсе, нәтижелі болары анық. Өзара үйлесіммен, бірлікпен, сеніммен атқарылған жұмыс ауылдың, ауданның даму бағытынан да көрініп тұрады.
Дайындаған Арайлым БЕЙСЕНБАЕВА,
«Soltüstık Qazaqstan».
Суретті түсірген
Шыңғысхан БЕКМҰРАТ.